Të paktën 20 persona humbën jetën dhe 786 të tjerë u plagosën si pasojë e tërmetit 6,6 ballë që ka goditur ujërat e Seferihisar të qytetit Izmir të Turqisë, njoftoi Autoriteti i Menaxhimit të Fatkeqësive dhe Emergjencave (AFAD), transmeton Anadolu Agency (AA).
Të paktën 725 u plagosën në Izmir, ndërsa në provincat fqinje, 5 persona u plagosën në Manisa, dy në Balıkesir dhe 54 në Aydın.
Nga agjencia gjithashtu njoftuan se pas tërmetit u regjistruan të paktën 244 tronditje më të vogla pasuese, 24 prej të cilave ishtin mbi 4,0 ballë.
Operacionet e kërkim-shpëtimit kanë përfunduar në 4 ndërtesa në Izmir, ndërsa puna vazhdon në 13 të tjera.
AFAD njoftoi se tërmeti ndodhi në ora 14:51 sipas kohës lokale në një thellësi prej 16,54 kilometrash.
Më herët, guvernatori i Izmirit, Yavuz Selim Köşger, tha se tërmeti shkaktoi një mini-cunami në qarkun bregdetar Seferihisar, ku mbeti i plagosur të paktën një person.
Nga AFAD thonë se mbi 450 automjete dhe mbi 3.200 punonjës u dërguan në vendin e ngjarjes, bashkë me 20 qenë nuhatës.
Gjysmëhëna e Kuqe Turke gjithashtu dërgoi 79 punonjës, 70 vullnetarë, 17 automjete dhe 5 kuzhina të lëvizshme që kanë kapacitetin për të shërbyer mbi 25 mijë persona.
AFAD gjithashtu bëri të ditur se 960 çadra, 4.500 batanije dhe 3.672 shtretër u dërguan në rajon.
Gjithashtu u bë e ditur se ndihma emergjente prej 5 milionë lirash turke (rreth 600.000 dollarë) u dërguan në rajon nga Ministria e Familjes, Punës dhe Shërbimeve Sociale, si dhe 3 milionë lira turke (rreth 360.000 dollarë) u mundësuan nga AFAD.
AFAD njoftoi se më vonë, një tërmet tjetër 5,1 ballë goditi Detin Egje, 20 kilometra larg rrethit Kuşadası të provincës turke Aydin.
Ministria e Mbrojtjes formon tryezë krize
Ministria turke e Mbrojtjes ka krijuar një tryezë krize pas tërmetit dhe dy helikopterë ushtarakë po marrin pjesë në përpjekjet e kërkim-shpëtimit.
Guvernatori i Stambollit, Ali Yerlikaya, tha se tërmeti u ndje edhe në Stamboll, por nuk u raportuan “negativitete”.
Ministri turk i Punëve të Brendshme, Süleyman Soylu, njoftoi se disa ndërtesa në provincëne Izmirit janë raportuar se janë rrënuar nga tërmeti.
“Përveç çarjeve të vogla në ndërtesa në qytetet Uşak, Denizli, Manisa, Balıkesir, Aydın dhe Muğla, nuk është raportuar për viktima”, njoftoi Soylu nga rrjeti social Tëitter.
Ministri turk i Mjedisit, Murat Kurum, tha se disa persona janë bllokuar nën rrënojat e pesë ndërtesave të shembura në Izmir. Ai njoftoi se është nisur për në rajonin e prekur nga tërmeti, së bashku me ministrin turk të Bujqësisë dhe Pylltarisë, Bekir Pakdemirli.
Presidenti Recep Tayyip Erdoğan publikoi një mesazh solidarizimi për qytetarët, duke u uruar të shkuara të gjithë qytetarëve që u prekën nga tërmeti.
Po ashtu edhe në palën greke është dëgjuar tërmeti që tronditi qytetin e Izmirit. Observatori Kombëtar i Institutit të Athinës fillimisht tha se magnituda e tërmetit ishte 6,6 ballë, por më vonë e korrigjoi në 6,7 ballë. Observatori tha se tërmeti tronditi ishullin veriperëndimor grek Samos në Detin Egje.
Raportohet se dy fëmijë humbën jetën në ishullin grek Samos.
