Senati amerikan ka vendosur zyrtarisht që Yuri Kim të jetë Ambasadore e Jashtëzakonshme dhe e Plotfuqishme e Shteteve të Bashkuara të Amerikës në Republikën e Shqipërisë. Vendimi vjen pasi komisioni miratoi një muaj më parë kandidaturën e saj.
Kim, ishte emëruar nga Presidenti Donald Trump në Qershor të këtij viti. Në një seancë para Komisionit të Jashtëm të Senatit për konfirmimin e saj, ajo tha se do të nxiste udhëheqësit e vendit për të zgjidhur ngërçin aktual politik në mënyrë që të forcohet perspektiva e hapjes së negociatave të anëtarësimit në BE.
Kim shtoi se do të inkurajonte gjithashtu Shqipërinë të zbatonte plotësisht reformat në drejtësi, përfshirë kontrollin e figurës së gjyqtarëve dhe prokurorëve dhe krijimin e strukturave të posaçme për luftën kundër korrupsionit dhe krimit të organizuar.
Ajo tha se sheh si përparësi edhe ndihmën teknike për Shqipërinë në hetimin, ndjekjen dhe ndëshkimin e korrupsionit dhe krimit të organizuar ndërnacional. Kim tha gjithashtu se do të inkurajonte Shqipërinë për të arritur nivelin dy përqind në shpenzimet e mbrojtjes deri në vitin 2024. Kim tha se do të punojë gjithashtu për të nxitur eksportet dhe investimet amerikane në Shqipëri.
Yuri Kim është gruaja e parë koreano-amerikane që përfaqëson SHBA në postin e një ambasadori, dhe gjithashtu personi i parë nga territori amerikan i Guamit që shërben në një post të tillë.
KARRIERA DIPLOMATIKE
Yuri Kim është anëtare në stafin e lartë të Shërbimit të Huaj dhe ka shërbyer në Departamentin e Shtetit si Drejtore e Zyrës së Çështjeve të Evropës Jugore.
Më herët, ajo ka qenë drejtoreshë e Qendrës së Departamentit të Shtetit për Studimin e Diplomacisë, Shefe e Stafit për Zëvendëssekretarin e Shtetit dhe Drejtore e Zyrës për Sigurinë Evropiane dhe Çështjeve Politiko-Ushtarake.
Ajo ka qenë gjithashtu Asistente Speciale e Ndihmës Sekretarit të Shtetit për Çështjet e Azisë Lindore dhe Paqësorit dhe anëtare e delegacionit të Shteteve të Bashkuara në bisedimet gjashtëpalëshe për t’i dhënë fund programit bërthamor të Koresë së Veriut.
Kim ka shërbyer si Këshilltare Politike në Ambasadën e Shteteve të Bashkuara në Bagdad dhe në Ankara. Ajo ka lindur në Kore dhe është rritur në ishullin Guam, një territor i SHBA në Oqeanin Paqësor
