Administratori i USAID-it, Mark Green, u takua me Kryeministrin Edi Rama. Administratori Green priti Kryeministrin Rama në selinë e USAID-it dhe i përsëriti atij ngushëllimet e popullit amerikan për shkatërrimin që solli tërmeti i 26 nëntorit. Administratori përgëzoi Kryeministrin për reagimin e shpejtë dhe të plotë të qeverisë së tij ndaj kësaj krize. Funksionarët diskutuan gjithashtu për mobilizimin e burimeve të USAID-it për të mbështetur Qeverinë Shqiptare menjëherë pas tërmetit.
Në vazhdim të takimit të tyre në Tiranë nëntorin e kaluar, dy funksionarët diskutuan mbi partneritetin aktual të USAID-it për të ndihmuar shqiptarët në Rrugën drejt Zhvillimit të Pavarur dhe për Integrimin Transatlantik duke vazhduar kërkimin e zgjidhjeve inovative që shfrytëzojnë ekspertizën e jashtëzakonshme të sektorit privat dhe të atij publik në Shqipëri, dhe, më gjerë, në rajonin e Ballkanit. Administratori Green dhe Kryeministri Rama ishin të një mendimi se korrupsioni dhe sundimi jo koherent i së drejtës, janë pengesat kryesore për zhvillimin e Shqipërisë, dhe Administratori riafirmoi angazhimin e USAID-it për të ndihmuar shqiptarët të adresojnë këto sfida, të cilat ulin besimin në institucionet shtetërore dhe cënojnë përpjekjet e drejtuesve për t’u shërbyer qytetarëve.
