Policia spanjolle në bashkëpunim me autoritetet holandeze dhe belge sekuestruan rreth 2 ton marijuanë. Janë arrestuar 19 persona pas operacionit, mes të cilëve shqiptarë në pozicione kryesore të organizatës kriminale.
Në operacion morën pjesë 300 agjentë, u bastisën 63 banesa dhe objekte në Spanjë, ndërsa u zbuluan 34,000 bimë kanabis, 14 automjete, 20,000 euro dhe një pistoletë.
Organizata drejtohej nga holandezë të mbështetur nga shqiptarët, të cilët ishin përgjegjës për kultivimin e marijuanës. Disa spanjollë ishin të ngarkuar me anën logjistike. Ata instaluan plantacionet në shtëpi ose depo me qasje të vështirë, gjithmonë larg qendrave të banuara për të kaluar pa u vërejtur.
Hetimet nisën kur agjentët zbuluan praninë e një grupi trafikantësh të drogës, të përbërë kryesisht nga shqiptarë, të cilët vepronin në Spanjë, Belgjikë dhe Holandë.
Spanja ishte një nga pikat nevralgjike të organizatës. Përmes një qytetari spanjoll, ata arritën të lokalizonin dhe gjenin shtëpitë ku kultivohej marijuana.
Të dhënat i modifikuan në mënyrë që të mos gjendeshin. “Kopshtarët” ishin përgjegjës për kultivimin dhe mirëmbajtjen e plantacioneve. Përveç kësaj, ata duhej të ishin të matur dhe të qëndronin brenda ndërtesave gjatë kohës së kultivimit deri në korrje.
Droga e kultivuar mbikqyrej nga banda përmes një qytetari me origjinë shqiptare. Banda përdorte pasaporta italiane, greke dhe sllovene dhe dokumente identiteti, të gjitha të falsifikuara, për ta bërë të vështirë identifikimin.
Policia pas operacionit nuk ka dhënë detaje lidhur me të arrestuarit. Hetimet vijojnë për të përfshirë të tjerë në këtë organizatë me aktivitet të gjerë, thuajse në të gjithë Europën Perëndimore.
