Shqipëria ka nisur zyrtarisht procesin e vaksinimit anti-covid ditën e hënë. Kryeministri Edi Rama dhe mjekët që luftojnë në vijën e parë të sulmit iu nënshtruan të parët këtij procesi.
Rama për të dhënë mesazhin pozitiv në popullsi, ndërsa mjekët për nevoja parësore. Vaksinat e para që erdhën në vendin tonë janë të firmës Pfizer, ndër më të mirat në botë.
Në një lidhje të drejtpërdrejtë nga “Air Albania” me emisionin “Shqipëria Live” ishte Iria Preza, specialiste e ISHP. Preza tregoi se një ditë më parë janë vaksinuar 50 persona, ndërsa sot diku te 60 persona që janë të personelit shëndetësor të Covid1, 2, 3 dhe 4.
“Kemi patur edhe personel epidemiolog, personel nga Fushë-Kruja, Kruja dhe Mati. Faza e parë i përket personelit, stafit shëndetësor dhe në mënyrë paralele do të vaksinohen edhe moshat e treta dhe personelit që kujdesen në këto shtëpi kujdesi”, tha Preza.
E pyetur nëse ka patur infermierë apo mjekë që janë telefonuar për të bërë vaksinën dhe nuk kanë pranuar, specialistja e ISHP-së tha se “jo”.
“Personat lajmërohen, vijnë në një ditë dhe orë të caktuar që t’i përmbahemi të gjitha masave të Covid-19. Nuk duam të kemi grumbullime të shumta në Air Albania, marrin konsultën, vaksinën dhe më pas duhet që të qëndrojnë edhe 30 minuta që të shohim se procesi ka shkuar mirë dhe i sigurt.
Deri tani ka qenë një procedure e qetë, nuk kemi patur probleme shqetësuese. Të gjithë janë këshilluar se nëse kanë ndonjë ndjesi jo të zakonshme, duhet të flasë me strukturat përkatëse për efektet që kanë.
Personeli është njeri si ju, si ne dhe kanë të drejtë për të patur opinionin e tyre. Deri tani personat që janë telefonuar, kanë pranuar dhe kanë ardhur për të bërë vaksinën”, vijoi ajo.
