“Në zgjedhjet e ardhshme do të kemi komisione zgjedhore të depolitizuara dhe votat do t’u besohen njerëzve që nuk kanë asnjë lloj detyrimi dhe zelli në raport me partitë për të shkelur ligjin”, deklaroi sot Kryeministri Edi Rama.
Në një prononcim për mediet pas mbledhjes së kryesisë, Rama u ndal te reforma zgjedhore, ku theksoi se “ne zbatojmë rekomandimet e OSBE/ODIHR-it”.
Lidhur me kërkesën e opozitës parlamentare për ndryshimin e sistemit zgjedhor, Rama tha se “të gjitha idetë respektive të çdo force politike janë legjitime, por është detyrim dhe nuk është çështje dëshirash e idesh, ecuria e mëtjeshme e procesit të konsoldimit të zgjedhjeve dhe modernizimit të përgjithshëm të vendit, zbatimi i rekomandimeve të OSBE/ODIHR-it”.
“Këtu nuk kemi çfarë diskutojmë dhe çfarë të gjejmë për t’u ndarë. Ne zbatojmë rekomandimet. Kemi qenë të hapur të dëgjojmë versionet e çdo pale por në zgjedhjet e ardhshme do të kemi komisione zgjedhore të depolitizuara, dhe pastaj të tjerat kanë rëndësinë e tyre, por kjo është kryesorja”, tha Rama.
Kryeministri komentoi edhe tërheqjen e opozitës nga jeta parlamentare, duke theksuar se ky është një vendim që ka dëmtuar rëndë vetë PD-në, por nuk cënon jetën politike deri në pikën e mosfunksionimit.
“Nuk kemi vakum. Do të ishte mirë që PD të ishte në parlament, por e ka marrë vendimin vetë që të iki. Është një vendim që ka dëmtuar rëndë vetë PD-në, nuk e ka bërë më të mirë jetën politike, por nuk e ka cënuar në pikën e mosfunksionimit. Ne jemi votuar që të udhëheqim”, tha Rama. /j.p/
