Kryetari i Aleancës Kosova e Re (AKR), Behgjet Pacolli, ka aterruar me aeroplanin e tij privat në Aeroportin e Prishtinës, ku është pritur nga policia
Pacolli u ka thënë gazetarëve në aeroport se ai nuk di se a do të lejohet të shkojë në shtëpinë e rtij, në Hajvali, apo do të dërgohet në karantinë, në Qendrën e Studentëve në Prishtinë.
“Nuk e di çka do të ndodhë me mua. Nuk e di nëse do të vendosem në konvikt apo në Hajvali”, ka thënë Pacolli.
“Unë di aq sa dini edhe ju. Madje ju mund të dini më shumë se çka po ndodh politikisht”, ka shtuar ai.
Pacolli ka shpjeguar edhe çështjen e lejes së aterrimit të aeroplanit të tij në Aeroportin e Prishtinës dhe ndërrimin e destinacionit të aterrimit.
Ai ka thënë se gjatë kohës që po fluturonte nga Zvicra për në Kosovë e ka ndryshuar destinacion, sepse është frikësuar nga, siç është shprehur, “ndonjë sulm terrorist” nga Qeveria e Kosovës.
“Leja ime e fluturimit njëherë është anuluar. Është kushtëzuar leja e dytë me implikime tjera, kinse në dhënien e lejes duhet involvuar disa ministri vitale të Kosovës. Unë fluturoj me një fluturake. Unë për here të parë jam frikësuar se institucionet e shtetit mund të kryejnë ndonjë sulm terrorist në mua, andaj kam ndryshuar destinacion”, ka thënë Pacolli.
Sipas këshilltarit të tij, Naim Murseli, zoti Pacolli do të kontrollohet nga ekipet mjekësore e policore dhe pas kontrolleve do të shkojë në rezidencën e tij, në Hajvali.
Kthimi i Pacollit në Kosovë është shoqëruar me përplasje të mëdha midis Qeverisë në detyrë, në njerën anë, dhe Presidentit të vendit dhe partive që po përpiqen të krijojnë një koalicion të ri qeverisës në Kosovë. Partia e Pacollit pritet të jetë pjesë e qeverisë së re. Ajo I ka vetëm dy deputetë në Kuvendin e Kosovës, por ato konsiderohen si vota të sigurisë për krijimin e shumicës së re në Kuvend.
Presidenti Hashim Thaçi e ka dekretuar Avdullah Hotin e LDK-së mandatar për formimin e qeverisë së re. LDK-ja thotë se e ka suguruar tashme këtë shumicë. Ajo ka bërë kërkesë që mbledhja e Kuvendit për votimin e qeverisë së re të mbahet të shtunën, më 2 maj.
Lëvizja Vegtëvendosje e ka dërguar në Gjykatën Kushtetuese dekretin e Presidentit Thaçi. Ajo është e bindur se Presidenti e ka shkelur Kushtetutën, në përpjekje që të krijojë qeveri të re pa pjesëmarrjen e Vetëvendosjes, si forcë e parë politike në Kuvend.
