Shefi i Departamentit të Emergjencave të Organizatës Botërore të Shëndetit (OBSH) Dr. Michael Ryan tha të hënën se numri i rasteve të infeksionit të koronavirusit në vendet më të goditura si Italia dhe Spanja është “potencialisht stabilizues”, por se nuk është ende koha për të lehtësuar masat e ashpra për të kufizuar dhe monitoruar përhapjen e virusit.
“Shpresojmë që të ketë rënie. Sidoqoftë, duhet ta shtypim virusin tani, dhe kjo nuk do të ndodhë vetvetiu,” tha Ryan në selinë e OBSH në Gjenevë.
Duke folur në një konferencë shtypi, Ryan tha se “tani duhet të fillojmë të shohim stabilizimin” pas kufizimeve në jetën shoqërore dhe “masave më të rrepta” në Itali, Spanjë dhe vende të tjera gjatë dy javëve të fundit.
Ai tha se konfirmimi i rasteve në epidemi pasqyron realitetin e transmetimit të tyre në të paktën dy javët e mëparshme.
“Rastet që shihni sot janë pothuajse historike. Eshtë njësoj si kur shikojmë galaktikat përmes një teleskopi, ne shikojmë dritën nga një miliard vjet më parë. Ne shikojmë realitetin që ka ekzistuar më parë,” tha Ryan për AP.
