Partitë politike në Kosovë nisën të mërkurën zyrtarisht fushatën për zgjedhjet e 6 tetorit. Tubimet në 10 ditët e ardhshme do të përdoren për të bindur 1,93 milionë qytetarët e vendit se kush duhet të dominojë 120 mandatet e parlamentit për 4 vite.
Premtimet e 25 subjekteve politike këto javë kanë variuar nga zhvillimi ekonomik e shoqëror, te reformimi i sistemit të drejtësisë apo avancimi i demokracisë.
Në hapje të fushatës para mesnatës, Vjosa Osmani, kandidatja e vetme për kryeministre nga partia opozitare “Lidhja Demokratike e Kosovës”, paralajmëroi një fitore historike.
Nga Nju-Jorku komentoi edhe kryeqeveritari në detyrë, Ramush Haradinaj, i cili ndodhet në kuadër të takimeve të Asamblesë së Përgjithshme të OKB-së dhe përballë shqiptarëve të diasporës, shprehu bindjen se koalicioni i tij do të triumfojë sërish.
Nga Partia Demokratike e Kosovës, Lëvizja Vetëvendosja dhe Nisma, kryetarët Kadri Veseli, Albin Kurti dhe Fatmir Limaj kanë shpalosur zotimet për luftë kundër nepotizmit dhe korrupsionit, forcimin e shtetit të së drejtës, dhe alternativat se si mund të normalizojnë raportet me fqinjin verior, Serbinë.
Faktori ndërkombëtar ka kërkuar që zgjedhjet e 6 tetorit të zhvillohen në një frymë paqësore dhe gjithëpërfshirëse, duke ditur se në to garojnë edhe parti të komunitetit serb dhe të tjera, të cilave me ligj u garantohen deri 20 vende në parlament.
