Kandidatja e Partisë Socialiste, Romina Kuko është renditur e para në sondazhin për kandidatet e qarkut Tiranë nga të gjitha partitë politike në garën zgjedhore të 25 Prillit.
Sipas rezultateve të publikuara në faqen e Qendrës “FuturAL” , zv.ministrja e Brendshme Kuko renditet e para me 195 vota duke vendosur në krye të preferencave të qytetarëve të anketuar, përfaqësimin e Partisë Socialiste.
Pason në renditje kandidatja e PD-së, Jorida Tabaku me 190 vota ndërsa në vendin e tretë dhe të katërt renditen përkatësisht Brisida Shehaj që kandidon për LSI me 152 vota dhe kandidatja e nismës Thurje, Borana Tartari me 80 vota.
Anketimi është realizuar në kuadër të iniciativës “Oferta Politike Gjinore” e qendrës FuturAL dhe analizon gjithashtu kuotën gjinore të partive në qarkun e Tiranës dhe grupmoshën përfaqësuese.
Nëpërmjet kësaj iniciative, FuturAL promovon pa dallim dhe përkatësi politike të gjitha kandidatet gra të Qarkut të Tiranës. Fokusi dhe synimi kryesor është informimi i votuesit për kuotat gjinore të ofruara nga secila prej partive politike dhe ndërgjegjësimi i votuesit për peshën dhe rëndësinë e votës preferenciale.