Shqipëria renditet ndër vendet me lirinë më të madhe në botë. Indeksi i këtij viti i lirive njerëzore e rendit vendin tonë të 38-tin në botë, ndër 162 shtete të ndryshme të globit.
Raporti publikohet nga Instituti “Fraser” dhe “CATO”. Indeksi i këtij viti shënon një përmirësim me 7 pozicione krahasuar me një vit më parë. Në krahasim me rajonin, vendi ynë është padiskutim i pari, duke lënë pas vetes Malin e Zi, Bosnje Hercegovinën, Maqedoninë e Veriut dhe Serbinë.
Në nivel europian ndërkohë, vendi ynë lë pas në renditje shtetet si Bullgaria, Greqia, Polonia apo Hungaria. Indeksi i përgjithshëm përllogariitet mbi bazën e 3 nën-indikatorëve kyç: liria personale, ajo ekonomike si dhe ajo njerëzore.
Shqipëria performon më mirë në atë ekonomike, ku renditet e 30-ta në botë, ndërsa në nën-indikatorin e lirive personale renditet e 46-ta në botë.
Në analizë merren shumë indikatorë, si: sundimi i ligjit, siguria, liria e lëvizjes, besimi, shoqeria civile, liria e shprehjes dhe e informimit, sistemi ligjor, të drejtat e pronës, madhësia e qeverisë, aksesi në financim, tregti ndërkombëtare, etj, etj.
Të dhënat në indeksin e këtij viti i referohen vitit 2017. Në nivel global, në vend të parë qëndron Zelanda e Re e ndjekur nga Zvicra dhe Hong Kongu, ndërkohë që në vend të fundit renditet Siria.
