Gent Cakaj në takim me ministrin e Jashtë gjerman Heiko Mass
Gjatë një vizite zyrtare në Gjermani, ministri për Evropën dhe Punët e Jashtme, Gent Cakaj ka zhvilluar një takim me homologun e tij gjerman Heiko Maas.
Lajmin e ka dhënë vetë Cakaj, i cili përmes një postimi në ‘Facebook’ deklaron se temë e bisedës së tyre ishte çelja e negociatave të Shqipërise me BE, duke gëzuar mbështetjen maksimale të Gjermanisë.
Nga ana tjetër, Cakaj deklaroi se shteti gjerman ishte në gatishmëri për ta ndihmuar Shqipërinë në planin e riparimit dhe rindërtimit, përtej ndihmës së saj të jashtëzakonshme në orët e para pas tërmetit tragjik.
‘Sot gjatë vizitës zyrtare në Berlin zhvilluam edhe një takim dypalësh me Ministrin e Jashtëm të Gjermanisë, Heiko Maas.
Diskutuam hollësisht për domosdoshmërinë e fuqizimit të procesit të zgjerimit të BE-së në Ballkanin Perëndimor dhe rëndësinë e patjetërsueshme të çeljes së negociatave për anëtarësim për Shqipërinë vitin e ardhshëm.
Shqipëria gëzon mbështetjen e Gjermanisë për hapjen e negociatave vitin që vjen!
Po ashtu, ndamë qëndrime të njëjta lidhur me vazhdimin e reformave transformuese të Shqipërisë dhe plotësimin e kushteve të paraqitura nga Bundestagu në funksion të rrugëtimit evropian.
Në fund, shprehëm mirënjohjet më të veçanta për mbështetjen e jashtëzakonshme të Gjermanisë për përballimin e pasojave të tërmetit që nga fillimi! Po ashtu, Maas konfirmoi gatishmërinë e tij të mëtejme për ta ndihmuar Shqipërinë në planin e riparimit dhe rindërtimit.
Gjithmonë falënderues për mbështetjen e Gjermanisë për zhvillimin institucional e demokratik dhe rrugëtimin evropian të Shqipërisë në përgjithësi’, shkruan Cakaj.
