Franca përforcon masat e sigurisë për protestat e së shtunës, më 24 tetor, duke përfshirë edhe njësitë elitare GIGN, RAID dhe BRI. Në njoftimin e 23 tetorit, Ministria e Brendshme konfirmoi dislokimin e elementeve të këtyre strukturave, krahas mjeteve të blinduara Centaure, për të parandaluar përsëritjen e sulmeve dhe plaçkitjeve të javës së kaluar.
Të specializuara në luftën kundër terrorizmit, lirimin e pengjeve dhe ndalimin e personave të armatosur apo të rrezikshëm, këto njësi kanë një profil të ndryshëm nga forcat që menaxhojnë zakonisht protestat. Sipas Le Monde, përgatitja e tyre për ruajtjen e rendit dhe menaxhimin e turmave është e kufizuar, çka ngre pikëpyetje mbi detyrat që do të kryejnë gjatë mobilizimit.
Plani i autoriteteve përfshin edhe kontrolle në stacione dhe akse rrugore, vlerësimin e itinerareve të protestave dhe masa për mbrojtjen e bizneseve. Ministria ka paralajmëruar ndërhyrje sistematike në rast sulmesh ndaj njerëzve dhe pronës.
Angazhimi i njësive elitare e vendos në qendër të debatit mënyrën e ndërhyrjes: si të përballohen aktet e rënda të dhunës, duke garantuar njëkohësisht të drejtën për protestë dhe përdorimin proporcional të forcës. /lemondefr
