Kryeministri Edi Rama ishte sot në Grabjan të Lushnjës, në një nga fermat më të mëdha të mbarështimit të lopëve dhe përpunimit të qumështit, ku në bashkëpunim me financimet e BE-së, po modernizohen proceset në sistemin e mjeljes për një qumësht më të sigurt në treg.
Kryeministri tha se me modele të tilla fermerët e vegjël duhet të shtyhen më përpara nga ana e mentalitetit dhe duhet të kuptojnë se gënjejnë veten me një ngastër të ndarë nga të tjerët.
“Prodhon ato që prodhon pastaj thotë se ‘nuk kam ku e shes’. Po si do ta shesësh nëse nuk je brenda një cikli më të madh dhe nëse nuk ka një bazë shitje ku ti mbaron punë. Pra, ti nuk je individualisht personi që shkon në treg, por je pjesë e një zinxhiri që shkon te pika e grumbullimit dhe ke kontratën, ku e ke tregun të siguruar. Si mund të rrihet me 2 lopë, me një çift dhish dhe të thuash pastaj të ma blejë shteti? Pastaj siguria që është tmerr”, tha Rama.
Krahasuar me 5-6 vite më parë, kryeministri theksoi se “sot është situatë komplet tjetër nga ana e mirëkuptimit dhe organizimit, me pikat e grumbullimit që po shtohen”.
“Kur kemi ardhur në fillim nuk kishte këtu as ku grumbullohej, tani ka sistem tjetër. Ne jemi tani në këtë fazë. Ne ishim të fundit fare, shumë mbrapa rajonit për thithje të financimeve nga Europa sepse askush nuk kishte bërë asnjë punë as për të përgatitur fermerët, as për të përgatitur kanalet e duhura të komunikimit. Sot jemi të parët”, tha Rama.
Ai u shpreh se “çdo individ apo familje që zotëron një ngastër duhet të ketë vullnetin e mirë dhe syrin të shoh për larg që të bashkohet me të tjerët”.
“Ti nuk ke nevojë ta kesh të gjithën një të unifikuar si individ, por ke nevojë që individët që janë në ato copa toke të bashkëpunojnë me ty. Ti i orienton, i thua më prodho këtë, ja ku e ke kontratën, pastaj se çfarë fitoj apo humbas unë nuk është më përgjegjësia jote. Ai prodhon dhe ta dorëzon”, tha Rama.
Sipas Ramës, për zhvillimin e bujqësisë duhet dije. “Në bujqësi e blegtori në këtë fazë që është Shqipëria është fakt se duke dhënë më shumë dije dhe duke ndihmar më shumë me aplikime për kontaktet dhe ju po ashtu duke përfituar dije nga gjithë këro marrëdhënie ndërkombëtare që keni, sjell një ndryshim të madh, është një bazë komplet e re e bujqësisë”, tha Rama.
Kryeministri tha se “problemi jonë i madh në 30 vjet ishte uji që na përmbyt, uji që na mungon, uji që nuk vjen në arë”.
Në këtë fermë blegtorale, ndër më të mëdhatë në vend ka 1 mijë krerë dhe ka përfituar nga programi IPARD. /j.p/
