Në mbledhjen e fundit të këtij viti Këshilli i bashkisë së Fierit ka miratuar buxhetin e vitit 2020, i cili i hap rrugë vazhdimit të punës dhe angazhimit të bashkisë për ofrimin e shërbimeve publike cilësore, nëpërmjet menaxhimit racional të territorit dhe krijimit të një mjedisi të sigurt dhe të shëndetshëm.
Kryetari i bashkisë së Fierit, Armando Subashi, tha se “buxheti i 2020 do të zbusë pabarazinë sociale përmes përmirësimit të sistemit arsimor dhe atij shëndetësor”.
“Po ashtu ky buxhet i hap rrugë vazhdimit të punës për një qeverisje transparente dhe të përgjegjshme, me synimin e vetëm zbatimin e kontratës që lidhëm me qytetarët tanë më 29 qershor të këtij viti. Ndërkohë që vë në dispozicion në mënyrë inteligjente e të gjitha burimeve financiare dhe njerëzore për harmonizimin e interesave për zhvillim ekonomik e social në të gjithë territorin e bashkisë Fier”, – theksoi Subashi.
Sipas tij, në 2020 do të mbetet përsëri sfida kryesore e bashkisë Fier edhe përmirësimi në vijimësi i shërbimeve publike, pastrimi i ambienteve publike, mirëmbajtja e infrastrukturës ekzistuese, përmirësimi i furnizimit me ujë të pijshëm e kanalizime, ndriçimi i ambienteve publike, riparimi i rrugëve rurale, pastrimi dhe rehabilitimi i kanaleve kulluese e vaditëse.