Prezenca e OSBE-së në Shqipëri, dje dhe sot, në bashkëpunim me Fakultetin e Drejtësisë të Universitetit të Tiranës, organizuan një seminar me stafin akademik të Programit të ri të Masterit në Kriminologji që po themelohet në të njëjtin Fakultet.
Merrnin pjesë rreth 30 akademikë nga Fakulteti i Drejtësisë dhe ai i Shkencave Sociale. Profesorja Kimberly McCabe, eksperte ndërkombëtare e kriminologjisë, nga Universiteti i Linçburgut, Virxhinia, SHBA, u ftua të ndante përvojën e saj me stafin akademik të këtij Programi të ri të Masterit.
Veç kësaj, në datat e mësipërme u mbajtën edhe takime individuale në lidhje me tematikën e lartpërmendur.
Prezenca synon t’i përgjigjet nevojave dhe sfidave të pedagogëve, duke i ofruar pjesëmarrësve konceptet, mjetet dhe aftësitë në lidhje me Programin e ri të Masterit në Kriminologji.
Aktiviteti ishte konceptuar në mënyrë të tillë që të zhvillonte kapacitetet dhe të ndihmonte për hartimin e sesioneve të ardhshme trajnuese për të njëjtin grup studentësh dhe akademikësh që planifikohen të zhvillohen në periudhën shtator – tetor 2020.
Profesorja McCabe mbajti gjithashtu një leksion të hapur në lidhje me Viktimologjinë në 20 maj me pjesëmarrjen e rreth 90 studentëve të Programit të Masterit në Drejtësi Penale, nga Fakulteti i Drejtësisë i Universitetit të Tiranës. Këto aktivitete janë organizuar si pjesë e projektit “Themelimi i Programit të Masterit në Kriminologji”, i cili mbështetet financiarisht nga Qeveria e Shteteve të Bashkuara.
Projekti synon krijimin e një programi shumë disiplinor të Masterit mbi Kriminologjinë në Shqipëri, duke përmirësuar kështu aftësitë kërkimore të profesionistëve, akademikëve dhe politikë-bërësve në vend për të identifikuar shkaqet thelbësore të krimit.
Projekti zbatohet në bashkëpunim të ngushtë me Fakultetin e Drejtësisë të Universitetit të Tiranës, si dhe me mbështetjen e Fakultetit të Shkencave Sociale të të njëjtit Universitetit dhe të Ministrive të Drejtësisë dhe Punëve të Brendshme.1 nga 3
