Sipas vlerësimeve më të fundit të institutit të Vienës për Studime Ekonomike Ndërkombëtare, kursi i këmbimit në vendet e Europës qendrore, lindore dhe juglindore është ndër më të prekurit si pasojë e krizës që po kalon globi këto kohë.
Për të ilustruar këtë, Instituti ka përpiluar një grafik, ku evidentohet zhvlerësimi i monedhës vendase kundrejt monedhës së përbashkët europiane për vendet e rajonit, prej datës 1 janar të këtij viti. Shqipëria është pjesë e listës, por figuron ndër vendet me normën më të ulët të zhvlerësimit.
Të gjitha vendet e analizuara figurojnë me monedhën e tyre të zhvlerësuar gjatë kësaj periudhe kohore, e as vendi ynë nuk bën përjashtim.
Vetëm se në Shqipëri, rënia rezulton relativisht e ulët, në rreth 3%. Për Kazakistanin dhe Ukrainën, zhvlerësimi është mbi 10%, ndërsa për Rusinë, gati 25%, thonë të dhënat e Institutit të Vienës për studime ekonomike ndërkombëtare.
