Një vend kryesor në fjalën e kryeministrit Edi Rama gjatë Asamblesë të PS zuri edhe reforma në drejtësi. Kryetari i Partisë Socialiste tha se askush nuk e besonte se diçka e tillë do të ndodhte një ditë në Shqipëri. Megjithatë, ai nënvizoi se sistemi i drejtësisë nuk është ende aty ku duhet.
“Për herë të parë, qysh nga ndryshimi i sistemit, janë vendosur themelet e një sistemi drejtësie që do të japë mundësinë fëmijëve tanë që nesër të mos e pësojnë si ata që ishin fëmijë ose që lindën në 1990 dhe që sot janë bërë burra e gra dhe nuk e kanë një sistem drejtësie të drejtë. Drejtësia sot nuk është ende aty ku ne e presim. Është thjesht një ferishte që po përpëplitet akoma në pelenat e përgjakura të një lindjeje të vështirë. Por kujt i shkonte mendja dhe kush tjetër mund ta bënte që korporata më e madhe antishtet, më fitimprurëse nën kostumin e shtetit, korporata e gjyqtarëve dhe prokurorëve do të pastrohet dhe një pastrim kaq i madh do të fillonte. Askujt!”
Këtë fjalim, Edi Rama e shfrytëzoi edhe për të sulmuar presidentin Ilir Meta dhe opozitarët Sali Berisha, Lulzim Basha e Monika Kryemadhi. Sipas tij, nëse ata vijnë në qeveri, shqiptarët ta harrojnë se do të kenë drejtësi.
“Kjo është një arsye qoftë dhe e vetme për të kuptuar se kush do drejtësinë në këtë vend nesër, duht të mbështesë sot PS. Nuk kanë nevojë të më dëgjojnë mua, mjafton të dëgjojnë Ilir Metën, Saliun, Monikën, Lulin, edhe pse Luli bën çfarë i thonë këta tre të tjerët për të kuptuar që me ne në krye ka shumë vështirësi, por do të ketë drejtësi. Me ta në krye ka vetëm vështirësi dhe kurrë drejtësi.” Vizionplus
