Aviokompania britanike “British Airways” ka pezulluar të gjitha fluturimet drejt dhe nga Kina për shkak të shpërthimit të koronavirusit, transmeton Anadolu Agency (AA).
“Pas këshillave të Zyrës së Jashtme kundër të gjitha udhëtimeve, por thelbësore në Kinë, ne me efekt të menjëhershëm kemi pezulluar përkohësisht fluturimet tona drejt dhe nga Pekini dhe Shanghai deri të hënën më 3 shkurt, përderisa vlerësojmë situatën”, tha kompania ajrore.
Mbretëria e Bashkuar dje këshilloi qytetarët e saj që të shmangin udhëtimet në Kinë për shkak të shpërthimit të koronavirusit në atë vend.
“Për shkak të rritjes së kufizimeve të udhëtimit dhe situatës së shëndetit publik, ne tani këshillojmë kundër të gjitha udhëtimeve në Kinë”, tha Sekretari i Jashtëm britanik, Dominic Raab.
Numri i vdekjeve në Kinë nga shpërthimi i koronavirusit është rritur në 132 persona.
Rreth 5.974 raste të konfirmuara të pneumonisë të shkaktuara nga konoravirusi, i njohur po ashtu si 2019-nCoV, janë raportuar në Kinë. Rajoni autonom Tibeti ka raportuar po ashtu një rast të dyshuar me këtë virus.
Po ashtu është raportuar se gjithsej 9.239 persona dyshohet se janë të infektuar me këtë virus.
Virusi, i cili për herë të parë u shfaq në qytetin kinez Wuhan, është përhapur në 30 provinca në vend.
Dhjetëra raste janë raportuar po ashtu në Japoni, Korenë e Jugut, Tajlandë, SHBA, Singapor, Francë, Gjermani, Malajzi, Australi dhe Vietnam.