Ditët e fundit është diskutuar shumë për sistemin e ri të udhëtimit të shtetasve që vendi i tyre nuk është pjesë e Shengen. Duket se në lidhje me këtë ndryshim ka pasur shumë komenteve, ndërsa BE ka bërë publik një artikull ku sqaron çfarë është sistemi i ri ETIAS, i cili pritet të hyj në fuqi në 2022.
Ka shumë vende që nuk janë në Bashkimin Evropian (BE) shtetasit e të cilëve mund të hyjnë në Zonën Shengen të BE-së pa pasur nevojë për vizë. Konkretisht, aktualisht ka 62 vende që nuk janë në BE, por janë pa viza.
Qytetarët e këtyre vendeve lejohen të shkojnë në vendet në Zonën Shengen për qëllime biznesi ose udhëtimi deri në 90 ditë. Gjatë këtyre 90 ditëve, këta vizitorë nuk lejohen të punojnë ose studiojnë, por mund të merren me veprimtari biznesi dhe turizmi.
Përveç kësaj, shqetësimet e fundit të sigurisë me terrorizmin dhe krizën e migrantëve kanë bërë thirrje për një menaxhim më të mirë të atyre që po hyjnë në kufijtë e BE-së. BE ka deklaruar vazhdimisht qëllimin e saj për ta bërë udhëtimin brenda kufijve të saj një përvojë më të sigurt.
Për të zvogëluar procedurat dhe kohën e pritjes, si dhe për të adresuar shqetësimet e sigurisë, Komisioni Evropian (KE) ka dalë me një zgjidhje – ETIAS.
Ky artikull do të përmbajë të gjithë informacionin që ju nevojitet në lidhje me këtë sistem të ri dhe nëse ju kualifikoheni për të.
Çfarë është ETIAS?
ETIAS qëndron për Sistemin Evropian të Informacionit dhe Autorizimit të Udhëtimit. Është një sistem plotësisht elektronik i cili lejon dhe mban gjurmët e vizitorëve nga vendet që nuk kanë nevojë për vizë për të hyrë në Zonën Shengen. Në një farë mënyre, ajo i ngjan Sistemit Elektronik të U.S për Autorizimin e Udhëtimit (ESTA), i cili shërben për një qëllim të ngjashëm. Procedurat ligjore për të kaluar ETIAS kanë filluar në 2016 dhe sistemi pritet të jetë në fuqi deri në vitin 2022.
ETIAS do t’i nënshtrohet një kontrolli të hollësishëm të sigurisë së secilit aplikant për të përcaktuar nëse ata mund të lejohen të hyjnë në ndonjë vend të Zonës Shengen. Ndërsa qytetarët e vendeve që nuk kanë nevojë për vizë për qëllime udhëtimi deri në 90 ditë në BE nuk kanë nevojë të kalojnë nëpër një proces të gjatë të aplikimit për vizë, ETIAS do të sigurohet që këta njerëz nuk janë një kërcënim i sigurisë. Ky sistem i autorizimit të udhëtimit do të mbledhë, do të mbajë gjurmët dhe do të azhurnojë informacionin e nevojshëm në lidhje me vizitorët për të përcaktuar nëse është e sigurt për ata të hyjnë në vendet e Shengenit.
ETIAS, përveç që përdoret për qëllime biznesi dhe turistike, do t’u lejojë njerëzve të vizitojnë vendet e Shengenit për arsye mjekësore dhe tranziti. Për më tepër, do të jetë e detyrueshme për të gjitha vendet që nuk kanë viza Shengen.
A është autorizimi për udhëtim i ETIAS-it një vizë e re?
Autorizimi ETIAS nuk është një vizë. Shtetasit e vendeve me liberalizim të vizave, sikurse Shqipëria, do të vijojnë të udhëtojnë pa viza në BE, por thjesht do t’u kërkohet që të marrin një autorizim nëpërmjet ETIAS-it para udhëtimit të tyre.
Autorizimi për udhëtimet ETIAS nuk rivendos detyrimet që kërkohen për vizat. Nuk ka nevojë të paraqiteni në një konsullatë për të bërë një aplikim dhe nuk merret asnjë e dhënë biometrike.
Aplikimi online ETIAS plotësohet brenda vetëm pak minutave. I vetmi dokument që do t’ju nevojitet për të aplikuar në ETIAS është pasaporta e vlefshme. Kostoja për të marrë një ETIAS është 7€ për person, ndërsa personat nën moshën 18 vjeç përjashtohen nga pagesa e kësaj tarife.
Pas miratimit, autorizimi ETIAS është i vlefshëm për tre vjet, për një numër të pakufizuar hyrjesh në të gjitha vendet e zonës Shengen, nëse nuk qëndron më shumë se 90 ditë në një periudhë prej 180 ditësh.
Cilët janë objektivat e ETIAS-it
Për BE-në, objektivi kryesor është forcimi i kontrolleve të sigurisë për personat që udhëtojnë pa viza në zonën Shengen, me qëllim përforcimin e luftës kundër krimit të organizuar dhe parandalimin e migrimit të parregullt.
Gjithashtu, do të përmirësojnë manaxhimin e kufijve duke thjeshtëzuar burokracinë dhe vonesat për udhëtarët kur paraqiten në kufi. Synimi është që të sigurohet një vlerësim i koordinuar i rreziqeve që paraqiten nga shtetas të caktuar të vendeve të treta në Vendet Shengen. Pritet që ky sistem të ulë në mënyrë të qenësishme numrin e refuzimeve të hyrjes në pikat e kalimit të kufirit.
