Të gjithë punonjësit e larguar nga puna nga data 1 Mars deri më 17 Maj do të përfitojnë pagën prej 40 mijë lekësh të vënë në dispozicion nga qeveria. Drejtoresha e Përgjithshme e Tatimeve, Delina Ibrahimaj sqaron se shkak për ecurinë e dobët të procesit ishin bërë afatet e përcaktuara, ndërsa tashmë me ndryshimin e tyre, përfitues do të jenë edhe 63 mijë individë të tjerë.
Në këtë pikë, Ibrahimaj u bën apel biznesve të aplikojnë deri më 5 Qershor, pasi në të kundërt do të gjobiten 50 mijë lekë për çdo punonjës.
Sa i takon numrit të individëve të larguar nga puna gjatë periudhës Mars-Prill, Drejtoresha e Tatimeve bën me dije se janë 38 mijë punonjës, të cilët i përkasin biznesve të mëdha, dhe shërbimet janë sektori më i goditur.
Sa i takon paketës së parë, sipas tatimeve përfitues janë 65 mijë individë të cilët kanë marrë dy këste dhe në fillim të Qershorit do të marrin pagën e tretë.
