Gjykata lë në burg Florant Nakon drejtorin e filialit të një banke të nivelit të dytë i cili në Janar i ka vjedhur klientit 30 mijë dollarë amerikan. ReportTv zbardh ekskluzivisht dëshminë e Nakos i cili para hetuesve ka pranuar krimin duke thënë se i duheshin paratë për të shlyer dëmin e një aksidenti ku ishte përfshirë.
“I vodha paratë pasi do shlyeja dëmtimet e një aksidenti ku u përfshiva”, ka thënë Nako para prokurorëve.
Nako ndodhet në qeli, ndërsa hetimet e prokurorisë janë përfshirë edhe në klientë të tjerë të mundshëm që mund të kenë rënë pre e vjedhjes së tij.
Vjedhja e 30 mijë dollarëve është bërë në muajin janar dhe më pas ai ishte larguar në Amerikë duke dhënë dorëheqjen nga posti i drejtorit të bankës. Pasi ishte rikthyer në muajin mars në Shqipëri, policia ka mbledhur të gjitha provat dhe ka mundur të vërë në pranga ditën e djeshme 35-vjeçarin Nako.
Duhet theksuar se denoncimin për rastin e ka bërë vetë banka, e cila që nga momenti i parë i konstatimit të incidentit ka ndërmarrë të gjitha masat e duhura sipas procedurave të saj të brendshme dhe kuadrit ligjor duke bashkëpunuar ngushtë me organet kompetente për zbardhjen e çështjes dhe mbrojtjen maksimale të interesave të klientit.
Sipas policisë së Tiranës, 35-vjeçari Nako duke shfrytëzuar pozicionin e tij si drejtor i një prej filialeve të Alpha Bank i ka vjedhur klientit në llogarinë rrjedhëse shumën prej 30.000 dollarësh/ Shqiptarja.com
