Turizmi kulturor – Rënia drastike në tremujorin e parë të vitit

Izolimi dhe kufizimet e lëvizjes së shtetasve kanë ulur ndjeshëm edhe turizmin kulturor në vend. Sipas të dhënave nga Instituti i Statistikave, në tremujorin e parë të vitit vizitat në muze, parqe arkeologjike dhe monumentet e kulturës pësuan një rënie të fortë me 51% krahasuar me të njëjtën periudhë të një viti më parë. Rënia është shtirë si tek vizitorët vendas, ashtu edhe tek ata të huaj. Nëse një vit më parë institucionet e trashëgimisë kulturore u vizituan nga afro 16 mijë turistë të huaj, për tremujorin e parë të këtij viti numri i tyre ishte pak më shumë se 5 mijë.

Në vitet e fundit, trashëgimia kulturore ka tërhequr një numër në rritje vizitorësh, e nxitur edhe nga tendenca në rritje e turizmit hyrës në Shqipëri. Vitin e kaluar u regjistruan 1 milionë e 65 mijë vizitorë në muze, parqe arkeologjike dhe në monumente kulturore. Për tremujorin e parë të këtij viti kjo shifër zbriti në vetëm 31 mijë vizitorë.

Shpërthimi i Covid 19 dhe mbyllja e vendit në muajin mars sollën një ulje drastike të numrit të turistëve të huaj. Sipas të dhënave nga Instituti i Statistikave, për muajin mars në Shqipëri hynë 95 mijë shtetas të huaj, në rënie me 66% krahasuar me të njëjtën periudhë të vitit të kaluar. Për tremujorin e parë të vitit bilanci i turizmit hyrës nga shtetasit e huaj në Shqipëri rezultoi negativ, me një rënie prej 17.5%.