Në shtëpinë e Milanit duket se punët nuk shkojnë mirë. Marrëdhëniet e yllit të skuadrës Zllatan Ibramihoviç me drejtuesit e klubit sidomos me shefin Ivan Gaxidhis kanë hyrë në një fazë delikate.
Sipas “milannews.it”, suedezi ka shkuar në zyrën e Gaxidhisit së bashku me kapitenin Alesio Romanjoli, portierin Asmir Begoviç dhe mesfushorin Xhakomo Bonaventura. Mësohet se Ibra ka shprehur dyshime rreth mënyrës së punës së kompanisë “Eliot”, e cila menaxhon Milanin. Reduktimi i pagave të lojtarëve me 50% për shkak të pandemisë së koronavirusit si dhe largimi i Zvonimir Bobanit ka rritur pakënaqësinë në radhët e lojtarëve të Milanit.
Nga ana tjetër, trajneri i Milanit Stefano Pioli ka kërkuar që ekipi të përqëndrohet te ndeshja me Juventusin ditën e premte, e cila do të përcaktojë dhe finalistin e Kupës së Italisë.
Por, me këtë gjendje brenda Milanit, situata duket vërtet serioze.
