Sot, në shkollën Ishull Lezhë u shpërndanë tableta digjitale për nxënësit e klasave kolektive. Për të përballuar kushtet kufizuese të pandemisë, ka nisur që në fillim të situatës së jashtëzakonshme transmetimi i leksioneve në “RTSH Shkollë”; video të cilat publikohen edhe në kanalin youtube të Ministrisë së Arsimit, Sportit dhe Rinisë dhe platformën Akademi.al për t’u përdorur edhe në vijim nga nxënësit dhe mësuesit. Tableta digjitale që dhurohen sot janë të dedikuara për nxënësit e klasave kolektive, që i shërbejnë pikërisht këtij qëllimi, rritjen e aksesit të nxënësve në mikrokozmosin digjital të klasës virtuale, nëpërmjet platformës “akademi .al”.
Kryeministri Rama tha gjatë eventit se rindërtimi i shkollave po vazhdon në të gjithë Shqipërinë. “Jemi në një shkollë të rindërtuar nga bashkia e Lezhës, që ishte në gjendje të vështirë si shumë shkolla në Shqipëri të cilat janë rindërtuar ose në proces rindërtimi. Përpjekjet për rindërtimin e shkollave të dëmtuara nga tërmeti vazhdojnë.” – tha ai duke theksuar se përpos luftës kundër Covid-19, digjitalizimi i shkollave do t’i shërbejë sistemit arsimor për një kohë të gjatë.
“Me anë të dixhitalizimit i ofrohet të gjithë fëmijëve akses cilësor në mësim dhe mësimdhënie nga mësuesit më të mirë të Shqipërisë. Kjo mundësi nuk i jepet vetëm fëmijëve të klasave kolektive, por të gjithë fëmijëve në vend, në këto kushte të luftës me një armik të padukshëm. Kjo që po ndodh sot për arsimin, do vazhdojë të zhvillohet dhe sofistikohet duke u bërë pjesë e pandashme e jetës arsimore e duke i dhënë mundësi jo vetëm nxënësve, por edhe mësuesve të adaptojnë mësimdhënien e tyre për të përmirësuar orët e mësimit; do të ndihmojë edhe prindërit që bashkë me fëmijët të aktualizojnë dijet e tyre.” – tha Rama.
Kryeministri theksoi se vëmendja e qeverisë vazhdon të jetë mbi sistemin shëndetësor dhe atë arsimor, duke i trajtuar të dyja si luftëtarë në front të parë kundër koronavirusit. “Sfidat e jashtëzakonshme e të përditshme të të gjithë sistemit arsimor, nga ministrja te punonjësi më i fundit në sistem, mijëra mësues që duhet të përballojnë ngarkesën e dyfishuar për shkak të kësaj situate, plus ngarkesën e jashtëzakonshme për të qënë dyfish prindër për fëmijët, për të qënë dyfish vigjilentë që ata si qytetarë të respektojnë distancat, të mbajnë maskat, të lajnë duart, sepse janë në kontakt me shumë fëmijë, por edhe me shumë familje. Mësuesit, mësueset, drejtuesit e shkollave, drejtuesja e arsimit sot janë krahas mjekëve, pjesë e frontit të parë.”
Në mbyllje, Rama lajmëroi se rreziku i mbylljes vazhdon të jetë present dhe këtë herë më i frikshëm se më parë duke bërë thirrje që askush të mos neglizhojë përgjegjësinë e tij në këtë luftë. “Rreziku që po kalojmë është rreziku për tu mbyllur përsëri, që do kishte shumë më shumë probleme dhe pasoja se më parë. Mund ta shmangim duke mos shmangur atë që duhet të bëjmë në përditshmëri, bezdinë jo të vogël të mbajtjes së maskës sapo dalim nga shtëpia, mbajtjen e distancës, të mosshkuarjes në restorante kur nuk është e nevojshme, etj. Bezdi shumë të vogla në raport me rrezikun që ekziston që të mbyllemi sërish, sepse ka rëndësi ajo që bën secili prej nesh.”
