Hyrja e Luiz Ejllit në shtëpinë e “Big Brother VIP Albania 5” ka sjellë atë që pritej: rritje drastike të shikueshmërisë dhe rikthim të vëmendjes masive te formati.
Por, ky sukses ka sjellë edhe një “problem” të madh për ndjekësit, të cilët kanë nisur një fushatë të pazakontë në rrjetet sociale.
Në faqen zyrtare të programit, qindra komentues po kërkojnë me humor “largimin e menjëhershëm” të fituesit të BBV2. Arsyeja nuk është sjellja e tij, por fakti se ai po i mban të gozhduar pas ekranit deri në orët e para të mëngjesit, duke u bërë pengesë për punën dhe shkollën.
Komentet epike kanë pushtuar rrjetin:
Një ndjekës i shkruan produksionit: “O produksioni a ka mundësi të dali jashtë Luizi se ngelem deri në mëngjes pas Luizit, pa punë, pa gjë. Ore a keni shpirt, zemër?”
Një student shpreh hallin e sezonit të provimeve: “A ka mundësi të martën me dal ky se jam në sezon, më la pa mësu.”
Një tjetër shton shkurt dhe qartë: “Aman dil nga Bigu se na le pa punë.”
Kjo situatë tregon më së miri “efektin Luiz”, ku publiku që kishte braktisur formatin, tashmë është rikthyer fuqishëm, aq sa janë gati të sakrifikojnë gjumin dhe angazhimet ditore vetëm për të ndjekur batutat dhe lojën e tij.
