Në ditën e sotme është bërë prezantimi i njësisë më të re speciale në strukturën e Policisë së Shtetit, e quajtur Njësia Operacioni Forca e Ligjit, e cila me miratimin e paketës Anti-KÇK do të jenë në gjurmim të strukturave së krimit të organizuar dhe konfiskimit të aseteve të tyre.
Prezantimi u krye nga Drejtori i Përgjithshëm i Policisë, Ardian Veliu, ministri i Brendshëm Sandër Lleshaj dhe kryeministri Edi Rama.
Në fjalën e tij drejtori Veliu shpjegoi se efektivët e kësaj force janë mjaft të përzgjedhur dhe se çdo person i akuzuar duhet të provojë asetet e tij, duke përfshirë edhe ato të rrethit të tij familjar, të cilat në rast konfiskimi do të vihen në përdorim të shtetit. Në këtë mënyrë atdheu do të bëhet i parehatshëm për kriminelët sipas tij:
“Një pjesë e grupeve të organizuara kriminale lëviznin lirshëm dhe gëzojnë pasuri marramendëse. Kjo histori nuk mund të vijojë më kështu, duhet ta provojnë që pronat, mjetet dhe llogaritë kanë pasuri të paligjshme. Do të duhet ta provojnë ata burimin e paligjshëm të pasurisë së tyre. Rrethi është zgjedhur edhe te familjarët që bëjnë mbulesa për të humbur gjurmët. Të përgatiten se do të japin llogari. Paratë do të shkojnë në favor të shtetit. Për të përmbushjen e këtij prioriteti jemi të përgatitur për luftën me çdo lloj çmimi. Do ua bëjmë të parehatshëm atdheun kriminelëve”
Ndërkohë, ministri i Brendshëm Lleshaj u shpreh se kjo paketë e re ligjore, do t’i japë Policisë instrumente dhe mjete të reja në përdorim, në këtë mënyrë duke e bërë më efektive goditjen pasurisë së krimit të organizuar:
Shkatërrimi i burimit ekonomik dhe financiar që mban gjallë krimin, këtij modeli të shëmtuar dhe të rrezikshëm që gjeneron krime të rënda, josh shumë të rinj në rrugë të gabuar. Operacioni do të zhvillohet në bashkëpunim me SPAK dhe partnerët në një kuadër të përcaktuar ligjor. Objekt do të jenë pasuritë e deklaruara apo të fshehura.
Me asetet e konfiskuara do të kryhet modernizimi i Policisë së Shtetit sipas ministrit të Brendshëm dhe se të gjithë makinat e konfiskuara do të t’i shtohen flotës së policisë së shtetit.Edhe kryeministri Rama ishte mjaft i ashpër në fjalën e tij përpara njësisë së re speciale. Sipas, kreut të ekzekutivit “një kohë ekstreme kërkon masa ekstreme” duke e cilësuar miratimin e kësaj pakete një moment historik dhe si një krah shtesë në ndihmë të SPAK-ut.
“Kam shumë besim se jemi në kohën e duhur dhe në vendin e duhur dhe kemi forcat e duhura për një ndryshim historik. Duhet t’ua bëjmë të parehatshëm atdheun kriminelëve. Nuk mund të jetë sheshi i ndërtimit për vilat dhe bizneset e tyre, që nuk burojnë nga puna, por edhe nga gjaku i komisarëve dhe policëve të vrarë në 30 vite. Nuk mund të jetë platforma e ekspozimit të muskujve në club-e apo hapësira publike, duhet të jetë ferri i tyre” tha Rama.Sipas kryeministrit, pjesë e këtij operacioni, do të jenë dhe të gjithë personat e dyshuar, të cilat gjykata i ka dhënë pafajësinë në mënyra të paarsyeshme. GERI KOLGEGA
