Probleme me rrjetet sociale në mbarë botën, reagon zëdhënësi i “Facebook”

Prej gati 8 orësh tashmë rrjetet sociale si “Facebook”, “Instagram”, “Twitter” dhe “Whatsapp” kanë pasur probleme të shumta. Përdoruesit kanë hasur probleme me shfaqjen e imazheve në ‘”Instagram”, me mesazhet në “Twitter”, duke qenë se aplikacioni shfaq njoftime për mesazhe të palexuara. Për këto probleme ka reaguar edhe një zëdhënës i “Facebook” përmes një prononcimi për “CNN Business”. “Gjatë një operacioni rutinë për mirëmbajtjen e rrjeteve sociale ne kemi vënë re se ka qenë e vështirë për ngarkimin ose dërgimin e fotove dhe videove. Ne po punojmë që t’i kthejmë gjërat në normalitet sa më shpejt të jetë e mundur dhe ju kërkojmë falje për çdo shqetësim”, tha zëdhënësi i “Facebook” në emër edhe të aplikacioneve të tjera. “Twitter-i” ka reaguar me një deklaratë pothuajse të njëjtë, duke treguar se ende nuk dihen shkaqet e problemeve dhe po punohet për normalizimin e gjendjes. Ky ka qenë një shqetësim ndërkombëtar, sepse sipas “Down Detector” ka prekur disa vende. Në muajin mars, “Facebook” pati sërish të njëjtën situatë për shkak të një ndryshimi në sistem, që preku edhe aplikacionet e tjera si “Messenger”, “Instagram” dhe “Whatsapp”.