Sekretari i Përgjithshëm i Partisë Socialiste Taulant Balla i shprehu mirënjohje për Polonisë, Letonisë, Lituanisë dhe Estonisë për mbështetjen që i japin Shqipërisë për fillimin e menjëhershëm të bisedimeve për anëtarësim në Bashkimin Europian.
“Sot pasdite patëm mundësinë të takohemi me ministrat e Jashtëm të Polonisë Jacek Czaputowicz, të Letonisë Edgars Rinkēvičs, të Lituanisë Linas Antanas Linkevičius, si dhe me zv/ministrin për Çështje Europiane të Estonisë Märt Volmer”, thotë Balla, ndërsa shprehet se, “Komisioni Europian, përmes Metodologjisë së re të Zgjerimit, i ka ofruar vendeve të Ballkanit Perëndimor një plan të besueshëm në rrugën europiane dhe të bazuar në meritën individuale të secilit prej vendeve të Ballkanit Perëndimor”.
Balla thekson se, “Komisioni Europian përmes raportit të publikuar të hënën rikonfirmoi vlerësimin e qartë se Shqipëria dhe Maqedonia e Veriut janë gati për të filluar menjëherë bisedimet për anëtarësim në Bashkimin Europian”.
“Metodologjia e re e Zgjerimit zgjidh gjithashtu edhe hezitimin e tetorit të shkuar të ndonjë prej vendeve anëtare të BE, pozicioni i të cilave divergjoi mbi shpejtësinë dhe axhendën e procesit. Është tashmë në kredibilitetin e BE, që Këshilli Europian i fundmarsit të miratojë fillimin e bisedimeve për anëtarësim me Shqipërinë dhe Maqedoninë e Veriut”, shprehet Sekretari i Përgjithshëm i Partisë Socialiste, Taulant Balla.1 nga 3
