Kryeministri Edi Rama deklaroi sot se viti 2019 ka qenë padyshim viti më i vështirë i 6 viteve të qeverisjes për shkak të një përpjekjeje në themel të së cilës qëndron frika nga Drejtësia.
Duke folur në prezantimin e Paketës Speciale AntiKÇK, Rama u shpreh se, “për të gjithë është e qartë që ky ka qenë një vit i vështirë, posaçërisht i vështirë dhe nuk e teproj nëse them që në 6 vitet e mandatit tonë qeverisë ka qenë më i vështiri. Një vit i karakterizuar nga një përpjekje e vazhdueshme për të krijuar një situatë krize të thellë me mjete artificiale të politikës dhe për të shtrënguar të gjithë bashkësinë tonë brenda një rrethi vicioz përplasjesh që ka ka karakterizuar të gjithë gjysmën e parë të vitit”.
“S’ka asnjë dyshim dhe besoj se e ndaj me shumicën e njerëzve të vendit që në themel të asaj përpjekje ka qenë frika nga drejtësia. Frika nga drejtësia e lidhur me mundësinë reale të çeljes së negociatave pas të cilave dihet botërisht që vjen një proces ballafaqimi serioz mes vendit kandidat dhe BE për efektivitetin e sistemit të drejtësisë”, u shpreh Kryeministri.
“Pa asnjë dyshim kur është fjala për Shqipërinë kjo do të thotë dhënia e provave konkrete mbi faktin se gjithë reforma në drejtësi, gjithë bagazhi ligjor i krijuar në këto vitet e fundit korrespondon me kapacitetin sistemit të drejtësisë për të hetuar gjykuar dhe dënuar pavarësisht statusit social apo pavarësisht influencës apo forcës së individëve të caktuar. Që do të thotë adresim i korrupsionit deri në nivelet më të larta”, u shpreh Rama.
Pa dyshim, theksoi ai, “kjo ka qenë në themel të asaj të gjithë asaj përpjekje që kulmoi me atë situatë absurde surreale në procesin zgjedhor”, u shpreh kryeministri Rama. /j.p/
