Valdrin Pjetri nuk do të jetë kandidat i vetëm në garën e 30 qershorit për Bashkinë e Shkodrës. Burime të besueshme bëjnë me dije se përballë kandidatit socialist, do të jetë të paktën një rival për karriken e kryeqendrës së Veriut. Në kushtet kur PD ka njoftuar se nuk do të hyjë në zgjedhje, madje do ti pengojë ato me çdo mënyrë, kandidati socialist do të ketë përballë një kandidat të pavarur.
Në fakt, nuk është një emër i panjohur për Shkodrën. Ai njihet si botues i disa librave, të cilët i ka prezantuar në salla e televizione nga Shkodra në Tiranë. Njëkohësisht, ai është pinjoll i një prej familjeve të njohura shkodrane dhe nga ana tjetër, ka eksperiencë në fushata politike qoftë për kryebashkiak por edhe për deputet. Deri tani nuk ia ka dalë, por burime të besueshme bëjnë me dije se ai ka depozituar dokumentacionin e nevojshëm për të kandiduar në zgjedhjet e 30 qershorit për Bashkinë e Shkodrës.
