Panuçi do të mbahet mend te Shqipëria, jo vetëm në mënyrë të keqe sa i përket rezultateve të dobëta, por edhe për rregullin e fortë që vuri te kuqezinjtë. Ndoshta deri diku e tepruar, por asnjëherë nuk mund të kuptohet qartësisht limiti që duhet të kenë futbollistët për lirinë, me tejkalimin e normës së tyre.
Megjithatë, seancat stërvitore jo vetëm që do të ishin të mbyllur për mediat, lojtarët jo vetëm që duhej të mbërrinin fiks në orarin e përcaktuar në grumbullim pasi mund të merrnin leksionin e Cikalleshit apo Strakoshës, por edhe “Instagrami” duhej të harrohej përsa kohë ishte grumbullimi. Rrallëherë ndodhte në kohën e ish-trajnerit të kuqezinjve, që të shihnim foto apo video të publikuara nga lojtarët tanë në rrjetet sociale. E për më tepër, të buzëqeshur…
Por liria e trajnerit Reja nis që në këtë drejtim, madje e paralajmëruar. Në ditën e parë kur u zyrtarizua dhe shkeli në Shqipëri, italiani u shpreh se do të merrte të gjithë modelin e De Biazit, njeriut që arriti historinë me Kombëtaren tonë. Puna ka nisur dhe pamja e stërvitjes po na përsëritet si kohë më parë, me humorin e futbollistëve dhe fytyrat e buzëqeshura. Ajo që mbetet është të shihet sjellja në fushë dhe rezultati pas 90 minuta, që kanë rëndësinë më madhore.
