Kristi Qose mund të jetë risia e Kristian Panuçit për dy ndeshjet e para eliminatore të Kampionatit Europian 2020.
Mesfushori me origjinë nga Korça ka zhvilluar një sezon të shkëlqyer në kampionatin Sllovak me ekipin e Ruzomberokut dhe ka tërhequr vëmendjen e trajnerit të Kombëtares shqiptare.
Ky i fundit ka vendosur që ta grumbullojë për dy sfidat ndaj Turqisë dhe Andorrës, më 22 dhe 25 mars. Kjo është një mundësi e mirë për korçarin që të fitojë një vend titullari në ekipin kombëtar.
Kristi Qose është 23 vjeç dhe ka lindur në Korçë. Mirëpo, karrierën si futbollist e ka zhvilluar jashtë vendit duke pasur aventura dhe eksperienca të shumta në kampionatin grek. Nuk ka arritur të lërë gjurmë vitet e shkuara, por ky është sezoni më i mirë i karrierës së tij.
Pavarësisht se roli i tij natyral është mesfushor shkatërrues, Qose ka arritur të shënojë 6 gola për ekipin e tij dhe e ka ndihmuar që të marrë rezultate pozitive në kampionatin sllovak.
