Jemi zyrtarisht në sezonin e gripit, kur sheh që dikush tështin vazhdimisht; dikush merr frymë me vështirësi; një tjetër ka temperaturë, ethe dhe lodhje; dëgjon që njerëzit ankohen për dhimbjet e muskujve dhe kockave; sheh çaj kamomili me mjaltë në çdo lokal, shkruan Botapress.info
Ndryshimi i temperaturave solli me vete dhe gripin sezonal, që ka pasoja serioze për njerëzit që vuajnë nga obeziteti ekstrem, sëmundjet kronike të mëlçisë, problemet e sistemit imunitar, sëmundjet kardiovaskulare, diabeti dhe jo vetëm.
Vaksinimi i përvitshëm është një ndër mënyrat më efektive për të ulur rrezikun për t’u prekur nga gripi. Përpos vaksinimit dhe barnave antivirale të rekomanduara nga mjeku, të tjera mënyra për të lehtësuar simptomat janë çajrat dhe lëngjet e frutave.
Që të mos prekeni nga gripi, bëni mirë që:
– të qëndroni larg vendeve me shumë njerëz;
– të konsumoni lëngje dhe produkte me vitaminë C;
– të lani duart pasi kolliteni/tështini që të mos rrezikoni njerëzit e tjerë, në rast se jeni me grip.
Nëse jeni me grip, hani mëngjes të pasur me energji, proteina dhe karbohidrate. Mos i refuzoni perimet si selino, karota, speca, brokoli dhe kungull. Sigurisht që nuk duhet t’ju shkojë ndërmend të merrni ushqime të konservura.
Përsa i përket çajrave, pini të preferuarin tuaj; për shembull me pak limon ose mjaltë. Mjalti lufton mikrobet dhe qetëson zonën e irrituar të fytit.
Të tjera ushqime me efekte pozitive:
- Agrumet – përmbajnë vitaminë C dhe antioksidantë;
- Frutat e stinës – si shegët;
- Djathë, thjerrëza, vezë, arra – të pasura me zink;
- Vera e kuqe – përmban substanca që parandalojnë shumimin e viruseve.
