Këshilli i Ministrave vendosi sot shpronësimet dhe marrjen në përdorim të përkohshëm të pasurisë, pronë private, për interes publik, në ndërtimin e bypass-it të Fierit.
Sipas këtij vendimi, pronarët e pasurive të paluajtshme, që shpronësohen, të kompensohen në vlerë të plotë sipas masës së kompensimit përkatës që paraqitet në tabelën bashkëlidhur këtij vendimi, për tokë bujqësore me sipërfaqe 699 608.33 m², me vlerë 342 434 216.43 lekë, si dhe objekte me vlerë 16 282 001 lekë, me një vlerë të përgjithshme shpronësimi prej 358 716 217.43 lekë.
Shpenzimet procedurale, në vlerën 2 914 000 (dy milionë e nëntëqind e katërmbëdhjetë mijë) lekë, të përballohen, si më poshtë vijon: 2 864 000 lekë, nga Autoriteti Rrugor Shqiptar; 50 000 lekë, nga buxheti i miratuar për Ministrinë e Infrastrukturës dhe Energjisë.
“Vlera totale e shpronësimit, në shumën 358 716 217.43 lekë, përballohet nga fondet e planifikuara për Autoritetin Rrugor Shqiptar. Ngarkohen Ministria e Infrastrukturës dhe Energjisë, Ministria e Financave dhe Ekonomisë, Autoriteti Rrugor Shqiptar dhe Agjencia Shtetërore e Kadastrës, Drejtoria Vendore Fier, për zbatimin e këtij vendimi”, citon vendimi i Qeverisë. e.xh/
