Myftar Armiri (1932–1993) është një aktor me kontribut të madh në artin skenik shqiptar dhe një emër i rëndësishëm i plejadës së aktorëve të mëdhenj në Estradën e Shtetit. Por fatkeqësisht ai është edhe një artist i lënë në “pluhurin e harresës”, ashtu si edhe shumë artistë të tjerë shqiptarë, sikurse po ndodh shpesh përgjatë këtij tranzicioni të pafund që po kalon vendi ynë, ku aktorë e artistë harroen e humbasin së bashku me materialet filmike ku kontribuan një jetë të tërë, e ku dhanë një kontribut të paçmuar në pasurimin e arkives së artit.
Myftar Armiri lindi në një familje libohovite në vitin 1932. Në vitin 1950, nën mbikqyrjen dhe nismën e regjisorit Xhemal Broja u thirr për të themeluar Teatrin e Kukullave, së bashku me M.Burden, E.Plasari, A.Kcira, A.Resuli, T.Ketën, Q.Toro, E.Dauti, M.Cobani etj. duke realizuar edhe premierën e parë të kësaj trupe, me titull “Fatbardha”, të shkrimtarit sovjetik Shnejdor. Në Teatrin e Kukullave Myftar Armiri kishte rolet e aktorit dhe detyrën e as/regjizorit, deri në vitin 1952.
Dy vitet e mëvonshme, gjatë kryerjes së shërbimit të detyrueshëm ushtarak, ai mori pjesë në Estradën e Ushtarit, ku vazhdoi deri në vitin 1956. Në këtë vit artisti Myftar Armiri fillon punë në Estradën e Shtetit, fillimisht si prestigjator e më pas si aktor, deri në vitin 1968. Gjatë kësaj periudhe ai studjoi dhe u diplomua më pas më 1962 si aktor dramatik.
Në Estradën e Shtetit Myftar Armiri pati një karrierë shumë të sukseshme artistike. Ai performoi në të gjitha premierat dhe në të gjitha aktivitetet e tjera që Estrada zhvilloi. Arti i tij si prestigjator, si aktor dhe si prezantues, në krah të partnerëve si S.Sallaku, S.Plasari, E.Dauti, R.Zyberi, D.Llukaci, M.Çobani, L.Ndoka, M.Pici, T.Kanci, B.Kapexhiu, Xh.Myftiu (Kacja), kengetareve simbol si Anita Take e Vaçe Zela etj., u shpalos në të gjithë talentin e vet të natyrshëm dhe thumbues.
Myftar Armiri u bë shumë i dashur për publikun që e mbushte sallën e Estradës për elegancën, ironinë e hollë, humorin e kulturuar, simpatinë dhe talentin e tij. Duetet artistike me Skënder Sallakun dhe Melpomeni Çobanin u mbajtën mend gjatë nga spektatori i asaj kohe, për batutat dhe personazhet e paumërta.
Në vitin 1950 interpreton në komedinë me tre akte të autorit rus V.Katajev “Një ditë pushimi”, sëbashku me emrat e medhenj Qenan Toro, Xhavid Xhepa, Rudolf Stambolla, Luan Qerimi etj. Ndërkohë, në vitin 1954 interpretin në shfaqjen “Midis nesh, pjesa – Ditari i një Bojaxhiu”, i autorit Mustafa Gerbelleshi, i adaptuar për skenë nga Dinios Bubabni, pjesë në të cilën arriti një tjetër sukses artistik.
Artisti Myftar Armiri ka interpretuar edhe në disa filma artistik të Kinostudios “Shqipëria e Re”, si filmat “Fortuna” (1959), “Estrada në Ekran”(1968), dhe mbas disa vitesh rikthehet të interpretojë ne filmin artistik “Historiani dhe kameleonet”. Në periudhën kohore 1970-1972 ai u emërua Përgjegjës i Teatrit në Institutin e Lartë të Arteve, ku bashkëpunoi me R. Ndrenikën, G. Kame etj.
Myftar Armiri për kontibutin e dhënë përgjatë punës dhe aktivitetit të tij artistik është nderuar me “Urdhrin e Punës të Klasit te II” në vitin 1987. Ai u nda nga jeta, nga njerëzit e tij të aferm dhe nga publiku që e ndoqi dhe e duarktrokiti nga sallat e skenave shqiptare për vite e dekada me rradhë, më 19 Gusht 1993, kohë në të cilën vazhdonte të punonte në gazetën “Rilindja Demokratike”.
E pa kuptueshme është heshtja e shtetit dhe në veçanti e drejtuesve të institucioneve përkatëse të artit skenik, në nderimin e këtyre figurave, të artistëve të paharruar të asaj plejade nismëtare që lanë gjurmë të pashlyeshme në historinë e artit shqiptar të skenës.
Burimi: Enver Amiri (i biri).
