Neurologu Kita Sallabanda Díaz ka përgëzuar masat e marra nga qeveria shqiptare, për të parandaluar përhapjen e koronavirusit, duke theksuar se vendimi është marrë në kohë dhe kjo do të sjellë një numër jo shumë të lartë të të infektuarve.
Duke vlerësuar masat në kohë që ka marrë Shqipëria, neurologu tha se “masat që ka marrë Shqipëria janë jashtëzakonisht të mira. Shqipëria është një vend që sistemin shëndetësor nuk e ka kaq solid, sa e ka Spanja dhe në qoftë se lihej përhapja e Covid-19 në Shqipëri pasojat do të ishin të mëdha, pasi është një vdekje që nuk dihet nga të vjen”.
“Unë e kam thënë në mbledhje të mëngjesit se masat që janë marrë nga qeveria shqiptare janë të mira, pasi ne nuk jemi në gjendje të marrim masat e Shqipërisë”, tha ai.
Duke folur për masat e marra në Spanjë, mjeku tha se të gjithë mjekët janë në shërbim të emergjencës.
“Në Spanjë në këtë moment janë 4 mijë të infektuar. Këtu 30% e të sëmurëve janë në gjendje të rëndë. Mjekësia publike spanjolle është një nga më të mirat në botë, është krijuar një komision i emergjencës, që drejtohet nga ministri i Shëndetësisë, dhe ai koordinon gjithë spitalet që janë rreth 70 spitale që kanë 1 qendër emergjence. Të gjithë ne mjekët nuk i përkasin spitaleve tona, por kësaj qendre koordinimi. Të gjithë ne mjekët jemi në dispozicion. Kanë filluar të hapen spitale ushtarake pranë spitaleve publike për të garantuar atë që kanë bërë objektiv 1 mijë shtretër për koronavirusin dhe 268-300 shtretër të kujdesit intensiv. Deri me datën 11 qeveria spanjolle veproi me ngadalë, pas datës 11 janë marrë të gjitha masat. Që nga dje ishin 84 të vdekur, sot janë 90, numri i tyre ka rënë ndjeshëm”, tha ai.
Po ashtu ai tha se “mjekët e specializuar kanë filluar të ndiejnë lodhjen. Kemi marrë informacione që për çdo nevojë ditën, natën, të na thërrasin dhe jemi në funksion të kësaj pune”.
Për sa i përket rregullave, mjeku tha se “këtu njerëzit kanë filluar në mënyrë graduale të ndërgjegjësohen. Sot janë mbyllur lokalet në rrugë. Po shikohet këtë fundjavë që gjërat do të shkojnë keq, Madridi do të izolohet komplet, nuk do të ketë as hyrje, as dalje. Kjo është perspektiva”.
Ndërsa për kohëzgjatjen e situatës, mjeku tha se “në Spanjë piku do jetë për dy javë, por vendimi që ka marrë qeveria është se masat e emergjencës do pushojnë kur të mos ketë më të sëmurë dhe parashikohet për dy muaj”.
