Ekonomia e Veriut të Shqipërisë është rritur 6 vitet e fundit mesatarisht me 2% në vit. Ky ritëm ishte sa gjysma e rritjes ekonomike që qendrës së vendit, Tiranës dhe Elbasanit, prej 4 % në vit mesatarisht në periudhën 2013-2018, sipas të dhënave zyrtare të INSTAT.
Të ardhurat mesatare për frymë në Rajonin e Veriut ishin 461, 826 lekë në vitin 2018, ndërsa në Rajonin e Qendrës ishin 33 për qind më të larta, me rreth 692,000 lekë për frymë në vit.
Me këto diferenca Veriut të vendit i duhen edhe 15 vite rritje me ritmet aktuale prej 2 për qind për të arritur standardin e të ardhurave që Qendra e vendit ka sot.
Zakonisht rajonet e Veriut kudo në Europë janë më të pasurat për shkak të se burimet natyrore kanë favorizuar industrinë, teksa rajonet e jugut zakonisht merren me bujqësi.
Edhe në Shqipëri në Rajonin e Veriut janë të përqendruara hidrocentralet që sigurojë në më shumë se 90 për qind të prodhimit të energjisë në vend dhe disa nga minierat më të pasura të kromit dhe brakrit.
Burimet natyrore të veriut, të cilat shfrytëzohen edhe sot e kësaj dite nga kompani publike apo investitorë private nuk i ndajnë fitimet me komunitetin lokal, siç ndodh me praktikat e vendeve të zhvilluara europiane.
Për efekt statistikor, Shqipëria është e ndarë në tre Rajone, Veriun, Jugun dhe Qendrën. Në Rajonin e Veriut përfshihen qarqet e Kukësit, Dibrës, Lezhës, Shkodrës dhe Durrësit, në Rajonin e Qendrës janë vetëm qarqet e Tiranës dhe Elbasanit dhe në rajonin e Jugut përfshihen qarqet e Beratit, Fierit, Gjirokastrës, Korçës dhe Vlorës.
Në vitin 2018, në rajonin statistikor Veri, PBB për frymë është 462 mijë lekë, duke shënuar një rritje nominale me 4,7%, krahasuar me vitin 2017. PBB për frymë e këtij rajoni është 19,1% nën mesataren e vendit.
Në rajonin statistikor Qendër, PBB për frymë është 692 mijë Lekë dhe pati një rritje me 5,6%, krahasuar me vitin 2017. PBB për frymë e këtij rajoni rezultoi 21,2% mbi mesataren e vendit.
Në rajonin statistikor Jug, PBB për frymë është 511 mijë Lekë, duke shënuar një rritje me 6,3%, krahasuar me vitin 2017. PBB për frymë e këtij rajoni është 10,4% nën mesataren e vendit.
Niveli më i lartë i PBB-së për frymë sipas rajoneve statistikore në nivel Qarku, në vitin 2018, ishte në Qarkun e Tiranës, me 783 mijë lekë dhe shënoi një rritje në terma nominale prej 5,1% krahasuar me vitin 2017. PBB për frymë e këtij qarku ishte 37,3% mbi mesataren e vendit. Më pas renditet Qarku i Fierit, me 599 mijë lekë, duke shënuar një rritje në terma nominale prej 8,4% ndaj vitit 2017. PBB për frymë e këtij qarku ishte 5,0% mbi mesataren e vendit.
Niveli më i ulët i PBB-së për në vitin 2018, u vlerësua në Qarkun Kukës me rreth 362 mijë Lekë duke shënuar një rritje në terma nominale me 7,3%, krahasuar me vitin 2017. PBB për frymë e këtij qarku ishte 36,6% nën mesataren e vendit.
