Mbante peng celularët në këmbim të kokainës, ndalohet trafikanti

Inciativat për biznes, rezultojnë shpesh të çuditshme. Një iniciativë të tillë ka zbuluar policia e Tiranës. Ajo ka konstatuar se një qytetar u mbante peng celularët të gjithë atyre që në këmbim të lëndëve narkotike nuk ofronin para. Celularët ktheheshin vetëm kur klientët paguanin.
Por për policinë kjo është veprimtari kriminale në fushën e shpërndarjes së drogave të forta. Operacioni i koduar “Hostage” ka çuar në prangosjen e një 41-vjeçari që ushtronte këtë veprimtari kriminale, ndërsa janë sekuestruar lëndë narkotike kokainë, telefona celularë dhe para të përfituara nga shitja e lëndës narkotike. Ky shtetas është kapur në flagrancë, gjatë operacionit, me doza lënde narkotike kokainë, e gatshme për t’u hedhur në treg në rrugën e Durrësit. Në banesën e të dyshuarit u gjetën dhe u sekuestruan në cilësinë e provës materiale dy qese më kokainë (306.6 gramë). Gjatë kontrollit iu gjetën 1 500 euro dhe 46 000 lekë të reja, që dyshohet se janë përfituar nga shitja e lëndës narkotike, si edhe 14 telefona smartfon, që poseduesi i lëndës narkotike ia mbante si peng për lëndën narkotike personave të ndryshëm, në shkëmbim të kokainës. Personi në fjalë akuzohet për veprën penale “Prodhimi dhe shitja e lëndëve narkotike.”