Tetori Rozë është mbyllur por vëmendja ndaj shëndetit të gruas nga Ministria e Shëndetësisë vazhdon. Mamografia e lëvizshme e cila shëtiti anembanë vendit gjatë 31 ditëve të tetorit vijon të shkojë aty ku ka më shumë nevojë, në mënyrë që tu vihet në ndihmë grave e vajzave që ende nuk e kanë bërë kontrollin e gjirit për këtë vit.
Deputetja socialiste Ermonela Felaj ka bërë të ditur se mamografia e lëvizshme është rikthyer përsëri në Kuçovë, ndërsa kontrolli i gjirit mund të kryhet me anë të mamografisë fikse edhe në spitalin e Beratit, në çdo kohë.
“Mamografia e lëvizshme, është sërish në Kuçovë këtë javë, falë angazhimit të doktoreshë Rina Asllanit. Ky është një apel tjetër për çdo grua që nuk kreu dot mamografinë gjatë tetorit dhe një mundësi për gratë e Lumasit që të organizohen për të marrë këtë shërbim në Kuçovë. Sigurisht edhe spitali i Beratit e ofron këtë gjë, tanimë si diçka fikse, por le të mbajmë parasysh drojën, pavendosmërinë që ekziston në të tilla raste dhe që shtyn pafundësisht një kontroll të domosdoshëm për shëndetin e gruas! Pra, dita për t’u bërë bashkë për veten dhe për fëmijët tanë, është tani,” shprehet deputetja Felaj.
