Është shoqëruar në polici gazetarja, Ilda Bejleri. Burime për dritare.net bëjnë me dije se gazetarja është shoqëruar pranë komisariatit numër 2, Tiranë, pas lajmit se përplasi me makinë pranë Drejtorisë Vendore të Policisë, Tiranë, 64-vjeçaren E.Gj.
Policia njofton se është sekuestruar automjeti i gazetares dhe po bëhet këqyrja me ekspertët, për të zbardhur dinamikën e ngjarjes.
Dritare.net ishte e para që raportoi për aksidentin e 64-vjeçares, e cila ndodhet në Spitalin e Traumës, jashtë rrezikut për jetën. Ne morëm dëshminë e të aksidentuarës, e cila na tregoi se, pasi e kishte përplasur, gazetarja ishte larguar menjëherë dhe atë e dërguan në spital njerëzit e tjerë, që ishin dëshmitarë të ngjarjes.
Ne pyetëm edhe vetë gazetaren, e cila fillimisht na tha që nuk kishte bërë asnjë aksident. Por më pas deklaroi në mediat e tjera se, nuk ishte aksident, por një inskenim.
Si përfundim, pas raportimeve në medie, policia ka shoqëruar në komisariat gazetaren, të cilës po i merret dëshmia për ngjarjen./K.C/dritare.net
