Kosova vazhdon përforcimet e saj në prag të takimeve të qershorit, ndërsa së fundmi është konfirmuar zyrtarisht edhe ardhja e lojtarit të Huddersfield nga “Premier League”, Florent Hadërgjonaj. Ky i fundit sapo është pajisur me pasaportën dhe do të jetë i gatshëm për dardanët. “Dua që të ju njoftoj se tani sapo kam marrë pasaportën e Kosovës dhe jam gati që të luaj me fanellën më të bukur në botë.
Dëshira ime gjithmonë ka qenë të luaj për vendlindjen time, mirëpo është dashur të vij momenti i duhur. Jam grumbulluar edhe nga Zvicra nga të gjitha grupmoshat deri në ekipin e parë”, kështu është shprehur Hadërgjonaj.
Teorikisht kjo ardhje është faktor pozitiv për grupin e Shalandit dhe objektivat që ka në të ardhmen, për të realizuar edhe ëndrrën e një kualifikimi në Europian. Por ajo që nuk qëndron, është “dashuria” e madhe e Hadërgjonajt që vjen kaq papritur për Kosovën. Në tre raste më parë po ky lojtar ishte ai që refuzoi dardanët, për të shkuar me Zvicrën. Madje edhe tifozët shqiptarë ndahen në dy kahe të ndryshme rreth kësaj çështje, mes atyre që e duartrokasin këtë afrim, e të tjerëve që e shohin me negativitet për shkak të sjelljës së Hadërgjonajt më parë.
“Ishte një situatë e vështirë pasi disa nga njerëzit thonë: “E gjithë familja juaj është nga Kosova dhe duhet të luani për ta”, ndërsa disa tjerë thonë: Ju keni lindur në Zvicër dhe duhet të luani për ta.
Mendimi im është se Zvicra më dha mundësinë të rritem, të shkollohem dhe të edukohem. Më bëri një djalë të mirë dhe një futbollist, e këtu ku jam jam falë futbollit zviceran. Zvicra i dha mundësinë edhe prindërve të mijë të kenë një jetë më të mirë dhe kjo është ajo që un dua t’ia shpërblejë”, ka thënë Hadërgjonaj për “Guardian” disa kohë më parë.
