Sa i takon prishjes së pallatit të vjehrrit të Lulzim Bashës, Xhafer Isufi ka patur nje debat te madh publik. Por ky vendim ka nxjerrë në pah edhe diçka tjetër, pasi Xhafer Isufi, vjehërr i Lulzim Bashës, është përfaqësuar në Strasburg nga Erinda Ballanca, sot Avokate e Popullit. Sipas dokumenteve të siguruara nga gazeta SOT, seanca ballafaquese në Strasburg ka ndodhur në datën 23 maj, ndërkohë që në këtë datë Ballanca u zyrtarizua si Avokate e Popullit. Pas marrëveshjes së 18 majit mes Lulzim Bashës dhe Edi Ramës, u vendos që institucioni i Avokates së Popullit t’i jepej opozitës dhe kjo e fundit vendosi që këtë post ta merrte Erinda Ballanca.
Seanca e zyrtarizimit të saj u bë në datën 22 maj 2017, kur u bë edhe emërimi i Ballancës. Një ditë më pas, vendimi u botua në Fletoren Zyrtare dhe zyrtarisht Erinda Ballanca në 23 maj ishte Avokate e Popullit. Edhe pse betimi i saj në këtë detyrë u bë shumë kohë më vonë, Ballanca e mori zyrtarisht postin e ofruar nga PD në datën 23 maj sepse në këtë datë u botua edhe në Fletoren Zyrtare. Duhet theksuar edhe fakti se ish-Avokati i Popullit, Igli Totozani e ndërpreu marrëdhënien e tij me institucionin në datën 23 maj dhe kjo tregon se posti i Avokatit të Popullit tashmë i përkiste Erinda Ballancës dhe se kjo e fundit e mori drejtimin e institucionit në 23 maj.
Mirëpo sipas ligjit për Avokatin e Popullit, neni 10, Avokati i Popullit ndalohet të bëjë pjesë në parti apo organizata politike, të kryejë veprimtari tjetër politike, shtetërore e profesionale dhe të marrë pjesë në organizmat drejtues të organizatave shoqërore, ekonomike dhe tregtare. Aty theksohet se e vetmja veprimtari shtesë që mund të ushtrojë Avokati i Popullit është ajo e pedagogut. Pra, sipas të gjitha fakteve të renditura më lart, Erinda Ballanca ka qenë në konflikt të pastër interesi me përfaqësimin që ka bërë në Strasburg.
Gazeta SOT
