Ekzekutimi i dy vëllezërve Astrit dhe Brahim Bilali para derës së shtëpisë, tronditën ditën e djeshme qytetin e Shkodrës.
Fari Vejuka, vjerri i njërit prej viktimave dhe gjyshi i ish-kampionit të boksit Asmer Bilalit, ka folur ditën e sotme rreth kësaj ngjarje.
Vejuka ka mbështetur kërkesën e nipit të tij për t’i dhënë leje, me qëllim që të marrë pjesë në ceremoninë mortore të babait dhe xhaxhait të tij.
“Në rastin që ka ndodh është një nga ngjarjet më të rënda që mund të ketë edhe Shkodra edhe gjithë Shqipëria. Këto janë gjëra që duhet t’i ndjekë djali dhe shteti duhet të marrë masa për ata që e kanë kryer këtë akt të shëmtuar. Kjo familje pothuajse është shkatërruar totalisht.
Asmer Bilali është djali i Astrit Bilalit dhe Asmeri është në burg prej disa muajsh. Ai do të jetë vetëm në varrim por ne kërkojmë që të lihet të paktën dy ditë tek banesa e tij për të pritur njerëzit sepse nuk ka askënd. Vëllai i tij 23 vjeç është shumë i sëmurë dhe nuk është askush tjetër.
Shpresojmë që institucionet të vendosin dorën në zemër dhe të na mirëkuptojnë në kërkesën tonë. I falenderojmë që e kanë lejuar të jetë në varrim por kërkojmë të qëndrojë pak më gjatë, te paktën dy ditë dhe normalisht me prezencën e policisë. Për të tjerat shteti të bëjë detyrën dhe nëse ka bërë dicka mund të dënohet por sot i kërkojmë ta lejojnë të paktën dy ditë që të qëndrojë sepse do dalin dy kufoma nga shtëpia jone”, deklaroi gjyshi i Asmerit.
Dyshohet se atentati është kryer për hakmarrje, ndërkohë lihen të hapura mundësitë që të ketë lidhje me ish kampionin e boksit, i cili është arrestuar vitin e kaluar si pjesë e grupit kriminal Bajri.
