Luiza Gega përfundoi e para në garën e 3000 metrave me pengesa, që u mbajt në Lojërat Mesdhetare. Kështu Shqipëria siguroi medaljen e dytë të artë në Oran të Algjerisë, pasi e kishte fituar të parën në sportin e mundjes. Gega me kohën 9:14.29 vendosi rekord të ri kombëtar, të cilin e mbante vetë më parë.
Atletja shqiptare e kishte paralajmëruar suksesin dhe medalja erdhi. 4 vite më parë kishte bërë të njëjtën gjë në “Lojërat Mesdhetare”, duke u renditur e para. Vitet kalojnë dhe Gega vazhdon të bëjë krenar vendin e saj.
Situatë e pakëndshme ndodhi në momentin kur u ekzekutua himni. Pritej të dëgjohej himni shqiptar, gjë që nuk ndodhi dhe Gega me delegacionin u habitën për këtë fakt. Megjithatë më vonë u përsërit himni dhe u vendos ai shqiptar.
Atletja shqiptare që mban rekordin në vrapimin 800, 1500 dhe 3000 metra, ka arritur sot një tjetër sukses për karrierën e saj. Ajo ka dalë e parë në vrapimin 3000 metra.
Gega realizoi një tjetër paraqitje fenomenale teksa vendosi edhe rekord të ri kombëtar me kohën 9:14.29, duke përmirësuar kështu rezultatin e një muaji më parë 9:15.48 që kishte arritur në Hengelo të Holandës.Kjo është medalja e dytë e Artë për Shqipërinë në këto Lojëra Mesdhetare. Shqipëria ka fituar medaljen e parë në Lojërat Mesdhetare “Oran 2022” që po mbahen në Algjeri. Mundësi Zelimkhan Abakarov është shpallur kampion në peshat 65 kg në stilin e lirë.
