Nuk është një lamtumirë nga futbolli, por është natyrisht një lamtumirë Parisit. Pas një sezoni në kryeqytetin francez mbyllet eksperienca e ish-portierit të Juventus tek kampionët e PSG.
Buffon ka preferuar të mos e mirëpresë propozimin për rinovimin e kontratës me klubin e emirit të Katarit. Një vendim i menduar me qetësi pas takimit të djeshëm në Paris. Për 41vjecarin tani hapet një kapitull i ri i një karriere të pafund. Lajmërimi ka mbërritur nga faqja e klubit Paris Saint-Germain ku falenderohet portieri “se ka nderuar fanellën kuqeblu”.
Lamtumira emocionuese e personale e futbollistit ka ardhur në faqen e tij në Instagram: “Ernest Hemingëay ka shkruar se ‘janë dy vende në botë ku mund të jetojmë të lumtur: në shtëpi dhe në Paris’. Nga sot këto të dyja për mua koincidojnë. Parisi do të jetë përgjithnjë edhe pak shtëpi. Faleminderit për atë që pata mundësinë të përjetoj. Faleminderit për mikpritjen, emocionet e lodhjet e kaluara së bashku. Shokë të punës të skuadrës e udhëtimit. 12 muaj më parë erdha plot entuziazëm, pritur nga ngrohtësia e tifozëve. Më mallëngjyet. Faleminderit me gjithë zemër. Largohem më i lumtur nga një eksperiencë që më ka përmirësuar. Sot mbyllet aventura ime jashtë Italisë: Psg më propozoi një rinovim kontrate por nuk e ndjeva se duhet ta pranoja, i shtyrë nga dëshira për tu përgatitur për një aventurë të re profesionale. Falenderoj Presidentin Nasser, drejtuesit e gjithë shokët e skuadrës. Ju uroj më të mirën i bindur se do të vazhdoni të shkruani së bashku faqe të kësaj historie të rëndësishme. Allez Paris! Merci e bonne chance pour tout!”.
