Një operacion i policisë së Shkodrës i koduar “Bregdet i pastër” ka vënë në pranga tre punonjës së administratës së Zonave të Mbrojtura për “Shpërdorim detyre”.
Gjithashtu janë proceduar penalisht edhe shtatë persona për “Pushtim toke”.
Nën akuzën e shpërdorimit të detyrës u bë arrestimi i Refik Zagani, 57 vjeç, banues në Shkodër, me detyrë rojë mjedisore në Zonat e Mbrojtura, Vesel Tusha, 56 vjeç, banues në Shkodër, me detyrë specialist në Zonat e Mbrojtura dhe Palë Keçi, 65 vjeç, banues në Shkodër, me detyre rojë mjedisore në Zonat e Mbrojtura.
Po kështu janë proceduar në gjendje të lirë për veprën penale “Pushtimit toke” Gj. P., 64 vjeç, E. L., 35 vjeç, L. K., 66 vjeç, Gj. M., 58 vjeç, Gj. L., 72 vjeç, M. K., 61 vjeç, dhe A. P., 47 vjeç, të gjithë banues në Shkodër.
Në zbatim të një plani masash të përbashkët mes Drejtorisë së Policisë Shkodër dhe Administratës së Zonave të Mbrojtura, në vijim edhe të operacionit mbarëkombëtar kundër informalitetit, janë ushtruar kontrolle në Zona të Mbrojtura në Qarkun Shkodër.
Si rezultat i kontrolleve ne Velipojë, janë konstatuar një sërë shkeljesh, si gërmime, shpyllëzime, rrethime me gardh me rrjete dhe me shtylla betoni etj.
Sektori i monitorimit, ku bëjnë pjesë specialistët dhe rojet mjedisore, ka për detyrë parandalimin, zbulimin dhe luftimin e dëmtimit, pushtimit, shpërdorimit, tjetërsimit, shkretëtirëzimit a degradimit të natyrës, të pyjeve e të tokës pyjore, të cenimit nga ndërhyrjet e pakontrolluara ne mjedisin natyror e ujor të zonës së mbrojtur.
Ndaj të dyshuarve për ndjekje të mëtejshme, materialet iu referuan Prokurorisë së Shkodrës.
