“Nëse në mandatin e parë qeverisës hapëm themelet dhe në të dytin shtruam kantieret, në mandatin e 3 do ta vendosim përfundimisht Shqipërinë në një nivel tjetër si shtet dhe ekonomi”.
Kështu deklaroi sot në Kongresin e Partisë Socialiste, Kryeministri Edi Rama. “Me 2 mandate që ne kemi marrë në 2013 dhe në 2017 kemi bërë shumë reforma dhe ndryshime shtetbërëse sesa në të gjitha qeveritë e këtyre 30 viteve. Detyra jonë është ta mbyllim këtë mandat me një bilanc kuptimplotë, por edhe me një program kuptimplotë reformash për mandatin e 3 të PS-së në qeverisjen e vendit”, tha Rama.
Rama tha se “ky nuk është një Kongres i zakonshëm politik por është një moment reflektimi dhe zhvillimi programatik”.
“Sot PS është më e fortë se sa ka qenë kurrë ndonjëherë në 30 vjet. Kemi mbështetjen e një shumice që na ka dhënë mandat ekskluziv dhe jo vetëm kaq, por me numrin më të madh të votave që PS ka marrë ndonjëherë, jo në raport me konkurrentët se këtë e ka bërë gjithmonë përjashtuar vitin 2005, por në raport me vetveten. Prandaj në zgjedhjet e ardhshme duhet të jemi jo vetëm partia e parë, se jemi e do të jemi pa diskutim, por të kemi mbështetjen më të madhe popullore që kemi pasur ndonjëherë deri tani. Dua 800 mijë vota për mandatin e 3 të PS-së. Është shumë e lehtë të thuhet, por më e vështirë të bëhet, për më tepër kur në rrugën e 8 viteve dhe në momentin kur do të na duhet të kërkojmë 800 mijë vota ka nevojë për të pranuar dhe kuptuar se duhet edhe më shumë energji, ndërkohë që një pjesë e energjisë është konsumuar”, tha Rama.1 nga 9
