Ka nisur orët e para të ditës së sotme aksioni për shembjen e ndërtesave pa leje në vijën bregdetare të Velipojës në Shkodër dhe të Karaburunit në Vlorë.
Është IKMT në bashkëpunim me Policinë e Shtetit që ka ndërmarrë këtë aksion, kështu ka bërë të ditur Ministra e Brendshme, e cila shton se janë angazhuar dhjetëra forca nga të dyja palët për shembjen e këtyre godinave pa leje pranë zonave të plazhit.
Aksioni nuk do të jetë vetëm me shembjen e godinave por edhe me procedim e ndëshkim me gjobë për subjektet që kanë shkelur ligjin.
Krahas kësaj, IKMT dhe Policia e Shtetit vijon punën për evidentimin dhe parandalimin e ndotjes mjedisore në lumenjtë e vijat ujore si dhe ndëshkimin e çdo kundërvajtësi, për prerjen e pyjeve apo dëmtime të tjera mjedisore, dhe njëkohësisht fton çdo qytetar e media të denoncojë shkeljet në numrin 112 ose përmes Komisariatit Dixhital.
