Burime mediatike kanë zbardhur detaje të reja në lidhje me strategjinë e përdorur nga 2 autorët e arrestuar për vjedhjen e rreth 25 milionë lekëve (të reja) nga makina e një biznesmeni në Tiranë. Ngjarja eshte regjistruar të premten e kaluar në zonën e Komunës së Parisit, pranë një qendre tregtare.
Hetimet paraprake kanë zbuluar se 2 të arrestuarit, Donald Hoxha, 27 vjeç dhe Gentian Kane, 44 vjeç, e kanë realizuar vjedhjen nëpërmjet një bllokuesi valësh. Biznesmeni Flamur Behi ka qenë nën vëzhgim të grabitësve për disa javë.
Pasi e kanë gjurmuar, kur biznesmeni Behi ka mbledhur xhiron e bizneseve që ai administron dhe ka parkuar mjetin në qendrën tregtare, autorët kanë aktivizuar bllokuesin e valëve, çka bëri që makina të mbetej e hapur, pavarësisht se biznesmeni mendoi se e mbylli me pult.
Pas largimit të tij, autorët kanë marrë qetësisht nga bagazhi paratë dhe janë larguar.
Biznesmeni Behi merret me import, eksport, tregtim cigaresh dhe artikujsh të ndryshëm.
Vetëm 2 ditë më vonë, policia ka arritur t’i identifikojë dhe arrestojë të rinjtë, të cilët janë filmuar nga kamerat e sigurisë në qendrën tregtare.
Policia ka sekuestruar edhe shumën e konsiderueshme të parave të vjedhura, nga të cilat mungonte vetëm një pjesë e vogël që autorët e kishin shpenzuar.
